LGU's giawhag pagtabang sa problema sa tunghaan

CEBU, Philippines - Si regional director Pedro Noval sa Department of Interior and Local Government (DILG)-7 miawhag sa kapolisan sa rehiyon ingon man sa tanang lokal nga opisyal nga moabag sa pagpatunhay sa kahusay’g kalinaw atol sa pagbukas sa klase karung petsa 15.

Si Noval mitambag sa lokal nga opisyal sa ilang responsibilidad alang sa pagpalambo sa natad sa edukasyon pinaagi sa pagpatuman og mga programa ilabi na ang may kalabotan sa kakuwang sa magtutudlo.

Sa nasayran ang kakuwang sa lawak saringan ug mga magtutudlo sa pampublikong tunghaan maoy usa sa dakong problema nga gipaabot nga masugatan unya sa pagbukas sa klase.

Apan matud pang Noval kun moabag ang LGUs matabangan gyud ang Department of Education sa maong problema pinaagi sa paggahin og pundo aron ipatukod og classrooms ug pagkuha og dugang magtutudlo.

Samtang ang kapolisan kinsa aduna nay programa sa pagpangandam sa Oplan Balik Eskwela giawhag gihapon ni Noval nga higpitan ang ilang pagbantay aron kapanalipdan ang mga tinun-an. (BANATNEWS)