Natabunan sa gikubkob

CEBU, Philippines - Nalandig sa tambalanan ang manag-live-in partner human sila matabuni sa yutang ilang gikubkob pasado alas-9 sa buntag kagahapon sa sapa sa sitio Tac-an barangay Budla-an ning dakbayan.

Ang duha giilang sila si Lorna Ramos ug Rolly Sandoval, pulos molupyo sa maong lugar kinsa parehong gidala sa Cebu City Medical Center human mahaw-as sa mga silingan gikan sa gikalubngan.

Usa ka Roland Lacit, 30, molupyo sa maong lugar ug usa sa mga mitabang pag-ugkat sa mga biktima mibutyag sa Banat News nga kalit lang niyang nadunggan ang iyang anak nga miingong adunay tawo nga natabonan sa sapa.

Dali niyang gisusi ang dapit ug mao nalay iyang naabtan ang nagsiwil nga kamot diha sa nahugmak nga yuta hinungdan nga iya kini nga gidali-dali og kabkab ginamit ang pala. Matud pa niya nga gidali niya og pangita ang ulo sa tag-iya sa maong kamot ug iyang nasutang kang Sandoval kinsa luya kaayo ug nag-apas kini sa pagginhawa.

Dali dayon niyang gisunod og pagkuykoy si Ramos, ug dihang iyang nakit-an ang siko niini dali niyang gipangita ang ulo. Sumala pa niya nga nagtikuko si Ramos diha sa ilawom ug nagsugod na og kalagom.

Dugang pa ni Lacit nga diha-diha nangabot ug mitabang ang uban nilang silingan, nalangay sila paghulbot kang Sandoval tungod sa kadaghan sa yuta nga nagtabon niini, giingong nagtindog pa nga napiko ang tiil ni Sandoval diha sa ilawom.

Sumala pang Lacit gipahimangno-an na niya dili palang dugay ang duha nga dili magpalabi og kubkob sa ubos nga bahin sa yuta tungod kay peligroso kining modahili apan gikatahong wala panumbalinga ni Sandoval ang pahimangno.

“Gi-ingnan na gani nako nga tumpaga na daan ninyo ang imabaw nga bahin kay peligro kaayo na,” matud pa ni Lacit.

Midugang pa si Lacit nga sulod sa walo niya ka tuig nga pagpangubkob karun pa nahitabong dunay aksidente sa maong dapit.

Sa pakighinabi sa Banat News ni PO3 Ramon Sanchez sa Talamban Police Station mibutyag nga igo rang naghatud og pamahaw si Ramos kang Sandoval dihang nahitabo ang aksidente.

Dugang pa ni Sanchez nga gamay lang ang ilang nadawat nga reklamo kabahin sa pagpangubkob sa maong dapit ug kun duna man silay respondehan wala sila kanunay maabtan.  - Ug Georgette Solitario, Jose Adrian Sollano (BANAT NEWS)