Radaza miduaw sa gipatay nga supporter sa Pangan-An

CEBU, Philippines - Personal nga giduaw ni Mayor Arturo Radaza ug kapikas nga si Paz, Bise Mayor Mario Amores ug mga konsehal sa dakbayan sa Lapulapu ang haya sa lider niini nga si Necasio Pogoy nga gipusil patay sa milabay’ng Sabado sa kaadlawon sa isla sa Pangan-an, isla sa Olango, dakbayan sa Lapulapu.

Si Radaza miingon nga lakip sa iyang pagduaw sa maong isla ang pagsusi sa kahimtang sa kahapsay ug kalinaw sa maong dapit.

Mipadayag si Radaza nga ilang sagubangon ang tanang gastohanan sa haya ug lubong ni Pogoy.

Gikasagmuyo usab ni Radaza ang hitabo nga sa iyang gidugayon sa politika karon pa nahitabo nga adunay sunod-sunod nga patay nga gituhoang adunay kalambigitan sa politika.

Gumikan niini, siya mismo ang mosusi sa maong isla kun anaa ba sa kagubot ang sitwasyon sa politika sa maong dapit.

Samtang si Lapulapu City Police Office Director Sr. Supt. Mariano Natu-el Jr. mipadayag nga unang higayon nga adunay alarma sa patay nga adunay kolor sa politika, apan ang iyang mga sakop nga nadestino sa maong isla mipadayag nga hapsay ug malinawon ang maong dapit.

Dugang polis ang idestino sa Pangan-an aron maseguro ang kalinaw.

Kahinumduman nga sa milabay’ng Sabado, atol sa usa ka disko sa maong isla, gipusil-patay si Pogoy sa iyang ig-agaw nga si Arnulfo Pogoy nga alyado sa oposisyon, human sa ilang panaglalis gumikan sa ilang suporta sa managlahing partido sa Lapulapu.

Ang kabanay sa biktima nagduda nga adunay kalambigitan sa politika ang krimen gumikan kay ang namatay usa ka lig-ong lider sa kampo ni Radaza ug ang upat ka mga suspetsado mga kaalyado sa kaatbang niini.

Sa laing bahin, ang kandidato pagka-mayor sa oposisyon nga si Junard “Ahong” Chan, kandidato pagka-kongresista sa Lapulapu lone district nga si Lito Ruiz mihimakak nga ilang mugna ang patay sa Lapulapu aron mapaubos ang siyudad sa Comelec control.

Matud ni Chan nga isip lider dili angayan mohimo og pamahayag nga makapainit sa katawhan.

Si Chan nagkanayon nga angayan hulaton ang resulta sa imbestigasyon aron matino kun aduna ba gyu'y kalambigitan sa politika ang pagpatay kang Pogoy.

Si Ruiz sa iyang bahin nagkanayon nga nasagmuyo siya nga sila'y gipasanginlan sa kampo ni Radaza nga hinungdan sa kamatayon ni Pogoy. – BANAT NEWS