Sinulog 2010: Pajo Elementary School, Tayud National High misakmit sa Sinulog sa Kabataan sa lalawigan

CEBU, Philippines - Gisakmit og balik sa defending champion sa milabay’ng tuig ang unang pwesto sa gipahigayong Sinulog sa Kabataan sa Lalawigan Competition kagahapon nga gihimo diha sa Cebu City Sports Center.

Sa elementary division nakuha sa Pajo Elementary School sa syudad sa Lapulapu ang unang ganti ug gisundan usab kini sa Santa Filomena Elementary School sa lungsod sa Alegria ug sa ikatulong ganti mao ang North City Central Elementary School sa West Toledo City.

Gisakmit usab ang ikaupat nga ganti sa Cambanay Elementary School sa dakbayan sa Danao samtang nakuha sa Bogo City Elementary School ang ikalimang pwesto.

Samtang sa high school division, gisakmit sa Tayud National High School sa lungsod sa Consolacion ang titulo samtang ang ikaduhang ganti nakuha sa Carcar City National High School, ang ikatulong ganti napunta sa gihiusang mga tinun-an gikan sa Talisay City National High School ug Lawaan National High School samtang ang ikaupat nga ganti nakuha sa Toledo National and Vocational High School sa dakbayan sa Toledo ug nabutang sa ikalimang pwesto ang Naga National High sa syudad sa Naga.

Nasayran nga ang Pajo Elementary School mao ang defending champion sa miaging kompetisyon sa milabay’ng tuig.

Nakuha usab nila ang best in costume samtang ang Tayud usab nakakuha sa parehong ganti nga may premyong P20 mil.

Ang premyo sa unang ganti nagkantidad og P150 mil ang ikaduha nagkantidad og P100 mil samtang ang ikatulo nagkantidad usab og P75 mil ang ikaupat nagkantidad usab og P50 mil ug ang ikalima nagkantidad og P25 mil.

Karung adlawa ipahigayon na usab ang Sinulog sa Kabataan sa Dakbayan nga salmutan sa mga nagkadaiyang eskuylahan sa syudad sa Sugbo.   (Elly Bolonos ug Lesley Caminade)    (BANATNEWS)