Politikong pabor sa gay marriage Botante gipahimangnoan

CEBU, Philippines - Gipahimangnoan sa kadagkuan sa Simbahang Katoliko ang katawhan nga likayan ang pagsuporta ug pagbotar sa mga kandidato karong eleksyon sunod tuig nga pabor sa same sex marriage.

Si Monsignor Esteban Binghay, Episcopal Vicar sa Archdiocese sa Sugbu nagkanayon nga kinahanglan ang katawhan magbantay ug mopili gyud niadtong mga kandidatong tarong ug ligdong ug dili lamang basta-basta nga motuo dayon sa ilang mga plataporma de gobiyerno ilabina ang paghatag og katungod sa katawhan tungod kay posibleng makapili na hinuon unya sila og politikong pabor sa mga same sex nga magminyo.

Gumikan kay nahitabo na kini didto sa America nga dunay mipasar og balaodnon ug nahimo gyung balaod nga nagligalisar sa same sex marriage.

Dako ang pagtuo ni Binghay nga resulta na kini sa paghatag og dugang katungod sa katawhan sa maong balaodnon hinungdan ilang gisukip ang pagminyo sa parehong lalaki ug babaye.

Matud pang Binghay sagrado ang kaminyuon sanglit usa kini ka butang nga hangtud sa kahangturan ug ang tumong niini mao man ang pagbuhat og laing binuhat ug dili ang paglingaw sa lawasnong kalipay.

Wala hinuon mabalaka si Binghay sa posibilidad nga motumaw kini dinhi sa Pilipinas sanglit iyang nakita nga duna ray pipila ka mga politikong mipadayag og suporta sa mga sektor sa third sex aron lamang makakuha og dugang boto atol sa eleksyon sunod tuig.

Ang Simbahang Katoliko hugtanong misupak sa gipasar sa Kongreso nga mao ang Reproductive Health Bill, tumong niini aron kamenosan na ang populasyon dinhi sa nasud sa Pilipinas.   (BANATNEWS)