'Duha gipamusil sa Naga usa patay, usa angol

CEBU, Philippines - Usa ang patay samtang usa ang naangol dihang gipamusil sa usa ka construction worker diha sa barangay Langtad lungsod sa Naga niadtong Domingo sa alas 8:10 sa gabii.

Ang biktima nga namatay giilang si Reynaldo Baricuatro, 31, taga sitio V. Rama barangay Langtad, Naga samtang ang kauban niining naangol mao si Renir Torion, 19.

Samtang ang suspek mao si Francisco Bastismo, 25, taga barangay Bairan, Naga ug usa ka construction worker.

Matud pa ni PO2 Ken Cabrera sa Naga police dihang nahinabi sa Banat News , ang mga biktima nag-inom ug nag-videoke sa tindahan sa usa ka Carlos Lapiz ug nagkaabot sa suspek nga mipalit og sigarilyo ug mitumaw ang panaglalis tali sa duha.

Matud pa sa kapolisan gipasanginlan sa suspek ang biktima kabahin sa nawala niining kwintas maong nasuko ang biktima ug mikwelyo sa suspek, si Torion mao nay mibuwag sa duha.

Ang suspek gikatahong mipauli ug mihulam og armas nga .357 gikan sa usa ka giila lang sa pangalang Romero ug mibalik sa gikahimutangan sa mga biktima.

Apan sa dalan palang nagkasugat na sila hinungdan nga kalit gipamusil ang duha tulo ka higayon ug naigo sa ulo si Baricuatro samtang si Torion napusilan sa walang paa ug nakadagan ug misumbong sa kapulisan hinungdan sa pagkasikop sa suspek. (Darrel Carumba ug Bryner Diaz, UV Journalism intern)(BANATNEWS)