BOPK nagpanon kagahapon

CEBU, Philippines - Pormal nang nakaduso sa ilang Certificate of Candidacy (COC) ang mga kandidato sa Bando Osmeña Pundok Kauswagan (BOPK) kagahapong adlawa.

Ang labaw sa BOPK nga si Mayor Tomas Osmeña nga magpapili pagkakongresista sa south district maoy nangulo pagsumitir sa COC ug ang standard bearer sa BOPK nga si Michael Rama ug Joy Augustus Young sa pagkabise-mayor.

Giubanan usab ni kongresista Raul del Mar ang iyang anak nga si Cutie nga modagan pagkakongresista sa north district sa umaabot nga piniliay.

Ang mga kandidato sa BOPK pagkakonsehal sa north district mao ang mga incumbent councilors nga sila si Edgardo Labella, Leah Japson, Augustus Pe Jr., uban sa mga newcomer nga sila si Alvin Dizon, Alvin Arcilla, Nida Cabrera, Sisinio Andales, ug Noel Wenceslao.

Samtang ang mga kandidato pagkakonsehal sa south district naglangkob nilang konsehal Rodrigo Abellanosa, Roberto Cabarrubias, Raul Alcoseba, Richard Osmeña, ug konsehal Joey Daluz uban nila ni kanhi konsehal Ronald Cuenco ug sa asawa sa mayor nga si Margot Osmeña.

Lakip usab nga niduso sa iyang COC kagahapong adlawa mao ang secretary general sa Magdalo nga si Ashley Acedillo nga magpapili pagkakongresista sa north district ingon man si Lahug barangay kapitan Mary Ann delos Santos, nga makig-atbang nilang Cutie ug Acedillo sa amihanang distrito.

Gipasabot ni delos Santos nga miuna siya pag-file og COC sa iyang mga kauban sa Kugi Uswag Sugbu (Kusug) tungod usab sa iyang mga igsuong   lumargahay sa Amerika.

Human gidawat ni City Election Officer Marchel Sarno ang iyang COC nihagit gilayon si delos Santos sa iyang mga kaatbang nga magdigahay sa ilang mga credentials tungod kay nakasiguro siyang dili peke ang iyang diploma ug di magpasabak sa Kongreso.

Wala hinuon muhingalan ang kapitan sa kandidato nga iyang gipasabot apan tataw nga ang iyang giigo mao si Cutie nga mahadlok moatubang ug motubag sa mga pangutana sa mga tigbalita. (BANATNEWS)