Saavedra mi-file pagka-mayor

CEBU, Philippines - Pormal nang miduso sa iyang certificate of candidacy (COC) ang magpapatigayon nga si Crisologo Saavedra sa buhatan sa Comelec sa siyudad sa Sugbo.

Kini alang usab sa paghatag og katumanan sa iyang pagpapili pagka-mayor sa dakbayan atol sa umaabot nga piniliay isip independenting kandidato.

Apan gitataw ni Saavedra nga siya mobutang usab unya og line-up alang sa pagka-konsehal sa habagatan ug amihanang distrito sa siyudad. Nagdumili hinuon una si Saavedra sa paghingalan niini, apan kini giingong langkuban sa mga sakop sa Integrated Bar of the Philippines (IBP) sa dakbayan.

Matud ni Saavedra nga siya nakahukom nga magpapili sa umaabot nga eleksyon tungod kay kini mao lang ang bugtong paagi nga iyang masumpo ang korupsyon.

Napakyas hinuon ang magpapatigayon sa paghingalan og usa ka transaksyon diha sa City Hall nga matawag og anomaloso.

Apan kini daling nangatarungan nga ang anomalosong transaksyon nagagikan sa nagkalain-laing paagi sama sa gahum, hiyas ug uban pa.

Gisaway usab ni Saavedra ang Filinvest deal nga gisudlan sa City Hall sa South Road Properties (SRP) nga usa ka dakong kwestyonable.

“The transaction is questionable because it was questioned by the province, then if it will be decided to be anomalous, we will end up paying back to the investor,” matud ni Saavedra.

Gipasabot sa magpapatigayon ang iyang sayo nga pagduso sa COC aron maputol na ang kinaiya sa mga politiko nga adto na sa katapusang adlaw moduso niini.

Butang nga gihangop usab ni City Election Officer Marchel Sarno tungod kay si Saavedra maoy unang misanong sa ilang panawagan.

Subay niini, gipahimangnoan ni Sarno si Saavedra nga motamod sa ilang gidili nga premature campaigning aron dili mamiligro nga mapasakaan og reklamo. – BANAT NEWS