Disaster Mgt. kinahanglan apilon sa plataporma sa mga kandidato

CEBU, Philippines - Giawhag ni Niel Sanchez, information officer sa National Disaster Coordinating Council (NDCC)-7 ang mga politiko nga nagplanong modagan karung umaabot eleksyon sunod tuig nga iapil sa ilang plataporma ang “disaster risk management.”

Duna na usab laing bagyong moigo dinhi sa Pilipinas nga mao ang bagyong Santi nga gikatakdang adto kini moigo sa Northern Luzon karung Nobiyembre uno atol sa kalagkalag ug adlaw sa mga santos.

Matud ni Sanchez nga dunay ubang Local Government Unit (LGU) nga wala gyud magtagad niining maong programaha.

Mitataw siyang kinahanglan himuon kining isyu sa ubang politiko aron mapalambo og maayo ang maong programa aron adunay pagpangandam ang tagsa-tagsa ka lokalidad sa higayon nga dunay kalamidad nga moigo dinhi sa tibuok rehiyon siyete kun sila na unya’y mangatungdanan.

Matud pa ni Sanchez iyang naobserbahan nga dunay ubang local chief executives dinhi sa rehiyon siyete ang wala gyud magtagad niining maong programa.

Siya midugang nga ang Pilipinas usa sa disaster prone areas sa South East Asia. Maong giawhag niini kadtong magpapili sa umaabot eleksyon sa sunod tuig kinahanglan iapil sa ilang agenda ang disaster risk management

Samtang si Oscar Tabada, pangulo sa PAG-ASA dinhi sa rehiyon nagkanayon gikinahanglan kaayo ang political will sa usa ka politiko aron mapatuman ang maong programa.   (Rey Pasaporte)    (BANATNEWS)