Jobs fair sa SM halad ni Noynoy ug Mar

CEBU, Philippines - Usa ka jobs fair ang himuon karong Sabado sa SM Trade Hall sa syudad sa Sugbo nga may temang “Trabaho para Kanimo” nga pasiugdahan sa duha ka Liberal Party Senators nga sila Benigno “Noynoy” Aquino ug Mar Roxas.

Ang maong job program gilusad sa duha sa tuyo nga matabangan ang mga Sugboanong nagkinahanglan og trabaho, gipaabot nga motambong sa jobs fair mao ang gagmay'ng kompanya ilabi na ang mga call center companies. Matud pa ni Roxas nga importante kaayo ang kaugmaon sa matag usa maong kinahanglang magtinabangay ang gobiyerno, publiko ug pribadong sector alang sa kalambuan. Gibana-bana ni Roxas nga sobra usa ka milyon pa ang walay trabaho karon ilabi na sa mga bag-o lang nga mitapos sa kolehiyo sanglit mao kini sagad naglisod usab sa pagpangita og trabaho.

Hinungdan nga ang duha ka senador namasin nga tungod sa ilang ipahigayon nga job program karung umaabot Sabado makatabang kini og dako sa mga nangita og trabaho. Magsugod kini alas-10 sa buntag hangtod alas-6 sa gabii Oktubre 17 nga tambungan sa Aegis People Support, eTelecare, Teletech, ICT Group, Vector BPO, TeleDevelopment Services, Lexmark International Philippines ug Lexmark Research and Development Corp. Si Aquino ug Roxas ania sa Sugbo karong adlawa alang sa himuong konsultasyon sa partido Liberal sa nagkalainlaing mga sektor sa Sugbo.

Si Aristotle Batuhan, coordinator sa Noynoy Aquino for President Movement (NAPM) nagkanayon nga ilusad usab ang maong movement karong hapon sa Sacred Heart Center. Matud ni Batuhan nga makighimamat si Aquino sa mga volunteers sa Sugbo. Sa sayo pa, si Atty. Democrito Barcenas nga maoy giila nga lider sa partido Liberal dinhi sa Sugbo nagkanayon nga nakahan-ay na ang mga kalihukan alang sa pagduaw sa duha ka senador nga naglaraw magpapili pagka-presidente ug pagka-bise presidente sa 2010. – BANAT NEWS