'Gun for hire' gitipi sa kauban

CEBU, Philippines -  Patay ang usa ka gipasanginlang gun for-hire human kini pusila makadaghang higayon sa iyang suod nga higala sa sitio Lower Kawayan barangay Sambag 2 pasado alas otso sa buntag kagahapon.

Ang gipatay giilang si Feliciano Dela Peña, 40, human nakaangkon og samad pinusilan sa nagkadaiyang parte sa lawas dihang gipusil ni Frederick Villamala alyas Wiwing.

 Ang biktima nagbuy-od na sa basketbolan sa nahisgutang lugar ug wala nay kinabuhi dihang naabtan sa kapolisan.

Matud pa sa kapuyo sa biktima nga si Raquel Palao nga sa wala pa mahitabo ang pagpamusil sayo sa buntag nananghid ang biktima nga molakaw ug pipila ka oras ang milabay ang suspetsado miabot sa ilaha.

Ang suspek gikatahong mibuhi og pulong nga “buanga aning Felix uy, gibaligya man ko niya.”

Dihang nabalik ang biktima daling gitug-anan ni Palao ang nahauna kabahin sa gipanulti sa suspek hinungdan nga gipangita kini sa iyang bana ug pipila ka minutos ang milabay buto na sa armas ang iyang nadunggan ug mao nalay iyang nahibaw-an nga gipusil na ang iyang kapuyo.

Matud pa ni Palao nga nasuko ang suspetsado tungod kay nagtuo kining ipadakop siya sa biktima ngadto sa kapolisan kabahin sa drugas nga gikatahong gibaligya niini.

Giangkon usab ni Palao nga ang iyang bana manggamitay og drogas hangtod karun ug usa kini ka gun for hire apan gikatahong iya na kining gipaundang.

Sa pakighinabi sa Banat News sa inahan sa suspetsado nga si Magdalena Villamala nagkanayon nga maong gipusil sa iyang anak ang biktima kini gumikan kay gipapusil sa naulahi ang suspek sa wala mailhing tawo sayo nianang buntaga samtang naghatud sa iyang anak sa tunghaan apan swerteng wala maigo.

Saysay usab ni Villamala nga ang hinungdan sa away sa duruha mao nga nasuko ang biktima nga dili mokuyog niya ang suspek nga ‘manira’ diin gikatahong ang motor sa suspetsado maoy gamiton sa biktima sa pagpanira og tawo.

Apan aminado si Villamala nga ang iyang anak gyud ang nagpusil sa biktima tungod kay igo lang midepensa ang iyang anak sa gibuhat sa biktima ngadto kaniya sa wala pa kini namatay.

Matud usab ni PO2 Leroy Baguio sa Cebu City Police Office, Homicide Section sa pakighinabi sa Banat News nga base sa ilang pasiunang imbestigasyon ilang gitan-aw karun mao ang anggulo sa drugas ug ang giingong pagka-hitman sa duroha. – BANAT NEWS