Misis nasakpan

CEBU, Philippines - Asawa naaktuhan sa bana nga nakighilawas og laing lalaki ibabaw sa lantay gawas sa ilang panimalay hinungdan nga ang lalaki wala makalikay sa kahait sa sundang nga gitigbas sa bana sa barangay Kangwayan lungsod sa Madridejos pasado alas 10 sa miaging gabii.

Ang natigbasan nailhan nga si Geraldo Gido Jagdon, molupyo sa barangay Poblacion   ug usa ka trabahante sa tubigan sa maong lungsod.

Samtang ang bana nga   nakatigbas mao si Nilo (tinuod nga ngalan gipugngan) molupyo sa nahisgutang lugar, usa ka panday. Wala makapugong sa iyang gibati nga kapungot si Nilo   human niya makit-i ang iyang asawa nga si Ferli (tinuod ngan gipugngan) nga nakighilawas og laing lalaki.

Matud pa ni PO3 Wilfredo Bunado sa Madredijos Police Station sa pakighinabi sa Banat News nga base sa gisaysay sa suspetsado nga pasado alas 9 sa miaging gabii sa diha nga naabot siya sa ilang panimalay mao gyuy mitagbo sa iyang mga mata ang iyang asawa ug ang lalaki nga naghilawas sa usa'g-usa sa lantay gawas sa ilang panimalay.

Tungod sa iyang kalagot mikuha siya sa iyang gidala nga sundang ug iyang gitigbas ang biktima sa maka-upat ka higayon ug wala pa kini makuntinto iya pa gyud kini nga gidunggab ginamit ang hunting knife.

Si Jagdon daling nakadagan paingon sa panimalay sa barangay kapitan ug mao na kini ang nagdala sa Madredijos District Hospital ug gibalhin na usab kini karon sa Vicente Sotto.

Samtang si Nilo boluntaryo nga mitahan sa iyang kaugalingon ngadto sa kapolisan ug misaysay pa kini sa kapolisan nga wala gyud siya magmahay nga iyang nabuhat ang pagtigbas ni Jagdon.

Sa diha nga nahinabi ni PO3 Bunado ang asawa nga si Ferli miangkon kini nga aduna sila'y relasyon ni Jagdon apan niadtong tungora nga naabtan sila sa iyang bana wala sila naghimo og dili maayo ug igo lamang sila nag-estorya ug wala sila nagbuhat sa gipasangil sa iyang bana.

Apan si Jagdon wala pa makadepensa ug kun nganong naabot siya sa panimalay ni Nilo ug Ferli.

Ang kapolisan karon nagpaabot na lang ni Jagdon nga mopasaka og kasok batok ni Nilo.

Nasayran sa Banat News nga si Jagdon usa ka minyo diin aduna usab kini tulo ka anak samtang sila si Nilo ug Ferli aduna tulo ka anak diin ang duha niini nagtrabaho na nganhi sa Sugbo ug usa na lang ang nagpabilin kanila. – BANAT NEWS