Pamilya mipatay sa kapuyo nahibulong sa 16 samad dinunggaban

CEBU, Philippines - Pamilya sa lalaking mipatay sa iyang ka-live-in partner nahibulong nganong duna kini 16 ka samad dinunggaban nga naglakip sa mga samad dinunggaban sa likod.

Matud pa sa inahan ni Von Eric Moyo nga si Hilda Moyo sa pakighinabi sa Banat News diha sa haya sa San Fernando Funeral Homes kagahapon gikatingala nila ang gidaghanon sa samad dinunggaban sa iyang anak.

Sa pasiunang imbestigasyon sa kapolisan nga si Moyo midunggab-dunggab sa iyang kapuyong si Ana Marie Nuez dihang naabtan sa ilang ka-boardmate nga testigo, nianang mga tungura nagpunay og singgit pagpangayo og tabang ang babaye.

Gikwestyon usab sa inahan ni Moyo nga kung tinuod nga nag-unay og dunggab ang iyang anak human niini mapatay ang kapuyo, giunsa man pagkahitabo nga duna kini dinunggaban diha sa likod.

Sa laing bahin, si Nuez gikatahong nakaangkon og 32 ka samad dinunggaban diha sa iyang kalawasan nga nakaingon sa iyang kamatayon.

Sa report sa kapolisan, giingong naabtan pa nilang nagtaop ang kutsilyo diha sa kutokuto ug likod ni Moyo samtang nagbuy-od na usab si Nuez nga wala na say kinabuhi.

Ang inahan ni Moyo sa pagkakaron base sa impormasyong iyang nadawat kabahin sa hitabo, giingong gidunggab sa iyang anak ang kapuyo ug pagkahuman nag-unay kini og dunggab sa kaugalingon.

Apan wala usab isalikway sa kapolisan nga posibleng nakasukol si Nuez niadtong tungura kay dihang gibiyaan sa testigos ang duha bugtong si Nuez lang maoy gidunggab, apan sa ilang pagbalik kuyog ang mga tanod ug polis gikatahong nagbuy-od na usab si Moyo.

Sa diha nga gipangutana kini ug kung aduna ba sila'y pagduda nga adunay laing tawo nga miapil sa maong krimen nagkanayon lang ang magti-ayon nga “no-comment” tungod kay ila lang isalig sa kapolisan ang imbestigasyon.

Butyag usab ni Ginang Moyo nga milakaw ang iyang anak niadtong Sabado nga nananghid nga mouli sila og Cebu aron isaulog ang adlaw nga natawhan sa iyang uyab nga si Ana Marie Nuez.

Apan mao nalay iyang nahibaw-an nga patay na ang iyang anak pinaagi sa pamilya ni Nuez.

Samtang ilaha pa usab gipangita karon kun kinsay miatiman sa ilang usa pa ka tuig nga apo nga anak sa managpuyong nagpatay, ang maong bata giingong diha gyud sa atubangan sa pagkahitabo ug nakaligo kini sa dugo sa iyang mga ginikanan.

Gihulagway ni Moyo ang iyang anak nga usa ka buotan ug tarong nga pagka-anak ug hilumon, gani bisan gamay nga estorya bahin sa relasyon nila ni Nuez wala gyud naghisgot niini ang iyang anak.

Apan sa miaging adlaw sa pakighinabi sa Banat News kang PO3 Geoffrey Gutual nagkanayon nga padayon pa ang ilang imbestigasyon ug pagtigom sa dugang ebidensya ug mga pamahayag sa mga saksi.

Una nang gidudahang hinungdan mao ang giingong pagselos ni Moyo nga duna nay laing uyab si Nuez ug buot na kining makigbuwag kaniya. Kahinumduman nga sa miaging Sabado sa kaadlawon nag-away ang duha ug miresulta sa pagpanunggab diha sulod sa ilang giabangang gamay nga balay La Guardia sa barangay Lahug. – BANAT NEWS