'I'm Sorry' ni Gwen sayop - Bolo

CEBU, Philippines - Gihulagway ni Bokal Juan Bolo nga dakong sayop ang pagpangayo og pasaylo ni Gobernador Gwendolyn Garcia nga may mga lapso o kasaypanan ang pagkapalit sa kagamhanan sa lalawigan sa Sugbu sa 25 ka hektaryang lote sa pamilyang Balili sa lungsod sa Naga.

Kini samtang gipakagamay ra ni Bolo ang kasong gisang-at batok kanila sa environmental lawyers nga kriminal ug administratiba diha sa Visayas Ombudsman.

 Matud pa ni Bolo nga wala siyay nakitang kasaypanan sa maong pagpalit tungod kay ang napalit nga lote haom man kaayo sa purpose sa Kapitolyo sa tinguha niining makatukod og pantalan sa habagatang bahin sa lalawigan sa Sugbu.

 “Sa ako lang ha, dili gyud na sakto (pagpangayo og pasaylo) kay ang purpose sa pagpalit pier man. Unya dili man mopalit og pier nga dili tapad sa dagat,” asoy pang Bolo sa interview sa DyRF.

Samtang kusganong gihimakak ni Bolo ang   pamahayag ni Governor Gwendolyn Garcia nga siya maoy namugos nga mapalit ang maong luna.

 Matud pa ni Bolo nga ang iyang silingan sa dakbayan sa Talisay nga si Lumen Durano, maoy niduol kaniya ug nangutana kun dili ba interesado ang Kapitolyo sa lote sa mga Balili ilabina nga may laraw ang probinsiya nga mobutang og pantalan hinungdan nga iya kining gisugyot ngadto sa gobernador.

 Giangkon hinuon ni Bolo nga siya maoy nangunay sa pag-deal kang Lumen Durano gikan sa pag-appraise sa maong lote hangtud na sa pagkapalit niini tungod kay gisugo usab siya sa gobernador.

 Gipahibawo usab ni Bolo nga sa wala pa mapalit ang maong lote nahibawo na ang gobernadora nga maapil sa pagpalit ang fish pond sa mga Balili. Samtang kabahin sa kaso, si Bolo mipakagamay lang niini sanglit gihulagway niyang wala kini basehanan tungod kay andam man mohatag ang Kapitolyo sa mga dokumento kun giadto lang kini sa buot mangayo og kopya.

Masaligon usab siyang di mosaler kanila ang maong kaso gumikan kay exempted sila si Garcia ug ang mga board members sa mga kihang susama niini samtang sila naglingkod pa sa ilang posisyon.

Nasabotan sa mga sakop sa Sangguniang Panlalawigan sa Sugbu nga imbitahon sa sunod sesyon karung Lunes ang brokers sa Balili property, ang abogada nga nag-notaryo sa deeds of sale sa nahisgutang luna, lakip na si Mayor Valdemar Chiong sa lungsod sa Naga ug Atty. Romeo Balili, administrador sa Balili estate. – BANAT NEWS