Mipusil sa traffic enforcer drayber sa traysikol - Natu-el

CEBU, Philippines - Suspek sa pagpusil sa traffic enforcer sa Lapulapu drayber sa traysikol sumala pa sa kapolisan.

Si Lapulapu City Police Office director, Sr.Supt. Mariano Natu-el mibutyag nga dunay mga saksing mipatim-aw nga nakakita nga drayber sa traysikol ang mipusil kang Archie Kahayagan niadtong Sabado sa gabii diha sa Tamiya, sa barangay Basak dakbayan sa Lapulapu.

Nagdumili hinuon si Natu-el sa pagbutyag sa pangalan sa maong suspetsado sanglit nagpadayon pa ang pagpalig-on sa mga ebidensya ug sa kasong ipasaka batok kaniya.

Ang biktima nga si Kahayagan human sa operasyon mitug-an sa kapolisan nga nakaila siya sa mipusil kaniya apan sa hulagway lamang niya kini natiman-an apan siya mikumpirmar nga drayber kini sa traysikol. Ang hepe sa CTMS nga si Franz Brazil mimando sa iyang mga sakop sa pagsusi sa mga biodata sa mga driver sa traysikol sa dakbayan ug usa kanila ang positibong giila ni Kahayagan nga maoy mipusil kaniya dihang gidala ang maong mga dokumento diha sa tambalanan.

Hangtud ning pagbalita wala pa hinganli ni Ssupt. Natu-el ang mga suspetsado gumikan kay padayon pa ang ilang pagsunod sa suspetsado sa iyang nahimutangan.

Matud pa ni Natu-el wala pa sila’y kasayuran sa motibo sa maong pagpamusil sa traffic enforcer apan padayon pa kini sa ilang imbestigasyon. - Bong Soriano (BANAT NEWS)