Bugoy nga mananagat gipangita

CEBU, Philippines - Duha ka mga bugoy-bugoy nga mananagat gipangita karon sa kapulisan sa lungsod sa Badian human kini ireklamo sa ilang barangay kapitan kay nagpabuto sa ilang armas didto sa baybayon sa Sitio Tunga, barangay Zaragosa, sa nahisgutang lungsod niadtong Sabado sa gabii. Si PO1 Arnel Tandoy sa Badian Police Station mibutyag sa Banat News nga si Kapitan Roque Belarmino maoy mireport sa ilang buhatan bahin sa maong hitabo.

Maoy hinungdan nga sila si SPO1 Vincent Aguanta kauban ang mga barangay tanod sa maong dapit mirespondi dayon, apan pag-abot nila sa maong lugar nakasibat na ang duha ka mananagat.

Gani gumikan sa kahadlok nabiyaan niini ang   duha ka mga .38 kalibre nga mga revolver diin ang usa niini aduna pay bala, ug mao nalang kini ang napunitan sa mga polis didto sa baybay.

Hinuon nakuha nila ang mga ngalan sa maong mga mananagat nga sila si Romie Deniega Sr., 48, ug Gilbert Valparaiso, 38, kinsa pulos ra taga sitio Tunga.

Wala pa matino sa kapulisan kun unsay motibo sa duha nga nagpabuto didto sa baybayon, hinuon gihikay na nila ang tukmang kaso nga ipasaka batok sa maong mga akusado. – BANAT NEWS