Tig-imprinta peking business permit sikop

CEBU, Philippines - Wala makaeskapo ang mga tag-iya ug tagdumala sa usa ka establisamento diha sa dalan Junquera ning dakbayan sa Sugbu sa dihang kini gironda sa mga operatiba sa National Bureau of Investigation (NBI-7) kagahapon sa mga alas onse pasado sa buntag.

Ang gidakop sa mga sakop sa NBI-7 mao sila si Oliver Rosaopan ug Ronnie Climaco nga maoy miangkon nga nagdumala sa Revillio’s Signmaster.

Kini tungod kay ang ilang patigayon gikataho nga maoy usa sa mga tinubdan sa mini nga mga business permit sa City Hall.

Si Mayor Tomas Osmeña maoy miawhag sa NBI-7 nga rondahon ang maong establisamento tungod usab sa iyang nadawat nga report.

Tuod man mipahigayon gilayon og surveillance ang NBI-7 ug dali kining mikuha og search warrant nga gitugot usab ni RTC Judge Gabriel Ingles.

Positibo ang resulta sa gihimong pagpangronda sa mga sakop sa nahisgutang ahensya base usab sa ilang nasakmit nga mga ebidensya.

Lakip sa gikuha sa NBI-7 gikan sa Revillio’s Signmaster mao ang mga computer machine ug uban pang mga kagamitan niini.
Gidala usab sa mga elemento sa NBI-7 ang nahuman na nga peking mga diploma sa nagkadaiyang mga tunghaan ug mga business permit.

Tukmang kaso ang ipasaka batok nilang Rosaopan ug Climaco nga pabiling nagpakahilom samtang gitanggong sa buhatan sa NBI-7.

Mapasalamaton si Osmeña ngadto sa mga sakop sa NBI-7 nga mitubag sa iyang awhag human usab masayod sa pagkasikop sa mga suspetsado.

Matud sa mayor nga ang siyudad dili angayang tikasan tungod kay kini naninguha alang sa kaayuhan sa mga magbubuhis.

“The City is not trying to cheat them, so, please don’t try to cheat the City, I’m doing my best, all the taxes you pay will not go to the car of the mayor, will not even go to the office of the mayor but for the betterment of the City of Cebu, so, it’s unfair if you are going to cheat,” nagkanayon si Osmeña. – BANAT NEWS