Sakop sa MMT nasakpang mipanso sa DTR sa kauban

CEBU, Philippines - Lain na usab ka sakop sa Mayor’s Management Team (MMT) sa Cebu City Hall ang nadakpan sa mga sakop sa Civil Security Unit (CSU) nga mihimo og kalapasan.

Niining higayuna, ang MMT nga si Russel Pernitez naaktuhan ni Allan Rubi sa CSU niadtong miaging adlaw nga mipanso sa Daily Time Record (DTR) sa iya usab nga kaubang MMT.

Nasuta ni Rubi nga duha ka DTR ang gipanso ni Pernitez sa bundy clock diha sa annex building sa City Hall ug ang usa iya kang Chantele Decina.

Nakompirmar sa Banat News nga ang duha ka sakop sa MMT anaa gidestino sa Cebu City Medical Center nga kanunay'ng gisaway ni Mayor Tomas Osmeña.

Matud pa ni City Attorney Joseph Bernaldez nga pagkasuspenso o pagkatangtang sa serbisyo ang silot sa maong matang sa buhat kung mapamatud-an.

“Dishonesty man na, primerong offense ana mahimong masuspenso ang empleyado ug kung grabe gyud mataktak siya sa serbisyo,” sumala ni Bernaldez.

Pipila ka mga kawani sa City Hall nga nasayod sa hitabo nagduda nga depensahan sa City Legal Office ang nalambigit nga sakop sa MMT tungod kay ang moimbestigar niini mao ang Employee-Management Committee On Investigation (EMCOI) nga gipanguluhan sa usa usab ka kanhi sakop sa MMT.

Gipasalig hinuon ni Bernaldez nga patas ang ipahigayong imbestigasyon tungod kay si Atty. Amay Abella anaa na mag-alagad sa ilang buhatan. – BANAT NEWS