11th inaugural session sa daghan og kalihukan

CEBU, Philippines – Padayong nangandam ang mga sakop sa Konseho sa dakbayan sa Sugbu alang sa gitakdang inaugural session sa City Council karong Miyerkules sa tuyo nga mahimo kining makahuluganon.

Si Bise Mayor Michael Rama nagkanayon nga dunay mga programang ipatuman alang sa ika-11 nga inaugural session sa konseho ug sa Sangguniang Panlungsod secretariat.

Ang inaugural session sugdan pinaagi sa usa ka Santos nga Misa sa atubangang bahin sa Legislative Building nga i-officiate ni Monsenyor Roberto Alesna.

Kini sundan sa usa ka flag raising ceremony ingon man sa parade and review sa mga sakop sa City Traffic Operations and Management (Citom).

Sa dili pa mamahaw ang mga sakop sa City Council uban sa mga bisita niini ipahigayon una ang photo session dayon ang caucus sa mga sakop sa konseho ug sugdan ang inaugural session sa alas 10:00 sa buntag.

Dunay himuon usab nga variety show diha sa Plaza Sugbu human sa paniudto ug kini tipik gihapon sa ipahigayong inaugural session.

Matud pa ni Rama nga mahinungdanon ang nahisgutang kalihukan tungod kay kini mao na ang katapusang inaugural session sa ika-onse nga konseho.

Gipaabot nga ang bise mayor moyagyag sa mga nahimo sa konseho sulod sa miaging duha ka tuig nilang pagpangatungdanan.

“Panahon gyud ni nga mahibaw-an sa katawhan kung unsa ang among mga nahimo kay ang uban mao ra may ilang nakita ang dili makita ambot ngano,” sumala pa ni Rama.

Ang pag-renovate sa Cebu City Legislative Building giisip sa bise mayor nga maoy labing dako nga proyekto nga ilang nahimo sulod sa ika-onse nga konseho. – Elly Bolonos (BANAT NEWS)