Tawo gipusil namatay

CEBU, Philippines - Patay nang naabtan sa mga tawo ang usa ka lalaki human pusila sa wala mailhing mamumuno sa bukirang bahin sa sitio Dugoan, barangay Binaliw pasado alas singko sa miaging hapon.

Si Jose Limpangog, 45, mag-uuma, nga diha sa maong lugar patay nang naabtan sa silingan (ngan gipugngan) nga wala nay kinabuhi ug dunay mga samad pinusilan.

Sa imbestigasyon sa kapolisan padulong na sa ilang balay ang saksi dihang kini nakadungog og buto sa armas ug gisundan og singgit sa tawo nga “tabang” makatulo ka higayon.

Gikatahong gisusi dayon sa saksi ang dapit diin maggikan ang tingog ug buto sa armas ug mao nalang ang iyang nakita ang lawas sa usa ka lalaki nga naligo sa iyang kaugalingong dugo.

Tungod sa kahadlok daling nangayo og tabang sa mga tanod sa ilang barangay.

Sa pagsusi sa kapolisan may samad pinusilan sa tuong bahin sa tiyan ug dughan ang biktima nga gituohang hinungdan sa iyang hinanaling kamatayon.

Si Kapitan Wilson Bacor sa barangay Binaliw sa pakighinabi sa Banat News miingon nga dunay migawas nga mga estorya sa mga silingan nga ang biktima adunay mga kontra apan nagdumili kini paghingalan sa maong mga tawo.

Sa laing bahin, arestado ang usa ka lalaki sa karsel sa Cebu City Police Office human aksidenteng nakapusil sa iyang ig-agaw samtang nagduwa-duwa og armas sa iyang higala.

Ang insidente nahitabo diha sa Juana Osmeña Extention sa Lower Purok 8 barangay Camputhaw pasado alas siete sa miaging gabii diin usa ka Joshua Suan Herbito, 18, maoy nabiktima.

Ang suspek nga iya rang ig-agaw giilang si Richie Herbito Baylosis, taga dalan Belgium sa barangay Sawang Calero.

Sa imbestigasyon sa kapolisan nasayran nga ang suspetsado uban sa iyang higala nga ginganlan og Nilo nga maoy tag-iya sa pusil nagduwa sa maong armas. – BANAT NEWS