2 ka lalaki patay

CEBU, Philippines — Patay ang duha ka lalaki human ang ilang gisakyang motorsiklo midasmag sa likod nga bahin sa usa ka naka-park nga multicab sa National Highway sa Barangay Tuyan, Naga City, Cebu, alas-2:40 sa kaadlawon niadtong Agosto 30, 2026.

Ang mga namatay giila nga si alyas "Nhomar", 25 anyos, drayber sa Honda Click 125, ug iyang backrider nga si alyas "Jovan", 30 anyos, silang duha mga residente sa Barangay Inayagan, Naga City.

Base sa inisyal nga imbestigasyon sa kapolisan, ang Suzuki Multicab van nga kolor itom ug adunay plakang JAH 2269 giparking daplin sa national highway ug nag-atubang sa direksyon paingon sa Cebu City.

Samtang, ang Honda Click 125 nga gimaneho ni Nhomar uban ni Jovan nga nag-angkas sa iya gikan sa Barangay Tangke ug padulong sa Barangay Inayagan.

Gikatahong nakainom og ilimnong makahubog ang drayber ug ang iyang backrider sa wala pa sila misakay sa motorsiklo.

Samtang nagpadulong sa Inayagan,giingong kusog nagpadagan sa motorsiklo ang duha ug pag-abot sa maong lugar mibangga kini sa likod nga bahin sa naka-park nga multicab.

Tungod sa kusog nga impact sa pagbangga, nangalagpot sa kalsada ang duha ka lalaki ug nakaangkon og grabeng bun-og ug mga samad.

Gidala dayon sila sa Naga City Infirmary, apan gideklarang dead on arrival sa attending physician. Pagabot sa mga otoridad wala na didto ang drayber sa multicab. Padayon ang imbestigasyon sa kapolisan aron mahibaw-an kung kinsay tagiya sa sa maong sakyanan.

Padayon pa ang imbestigasyon sa kapulisan aron mahibal-an ang eksaktong hinungdan sa aksidente. — /IBM (BANAT NEWS)