Multang P5,000 sa mga hugawan

CEBU, Philippines — Posible nga makamulta ngadto sa P5,000 o mapriso sulod sa usa ka tuig ang mga makalapas sa “Garbage Ordinance” sa Dakbayan sa Sugbo human nga gisugyot ni Konsehal Winston Pepito kung mapasar ang sugyot nga amendahan na ang ordinansa tungod kay wala na kini mausab sulod sa kapin 30 ka tuig.

Nalatid sa resolusyon ni Pepito nga kinahanglan nga amendahan ang Article 31 sa Ordinance No. 1361, o Garbage Ordinance sa siyudad nga katapusang giusab pa niadtong 1994 pinaagi sa Ordinance No. 1512.

Ang kasamtangang gisunod sa syudad mao ang P500 hangtud P1,000 nga multa o usa hangtud sa unom ka buwan nga pagkapriso ug adunay compromise penalty nga P2,000.

Matud pa ni Pepito nga kinahanglan na ipatuman ang graduated penalties tungod kay ang kasamtangang multa dili na magsilbing epektibong silot sa nagpadayon nga magpataka og labay sa ilang mga basura.

Ubos sa maong sugyot, mokantidad ngadto sa P2,500 hangtod P3,500 ang multa sa unang paglapas.

Kung dili makabayad ang nakalapas, obligado kini nga mohatag sa dili momenos 36 ka oras nga community service.

Sa ikaduhang paglapas, mosaka ang multa ngadto sa P3,500 hangtod P4,500 o usa hangtud sa tulo ka buwan nga pagpapriso kun diin magdepende kini sa hukom sa korte.

Sa ikatulo o mosunod nga paglapas, ang silot mahimong P5,000 nga multa o unom ka buwan hangtod usa ka tuig nga prisohan, nga parehong ipatuman sa korte.

Kun negosyo ang nakalapas, mahimo usab nga ipasuspenso, bawion o dili na i-renew ang ilang business permit o mayor's permit.

Sa pagkakaron, ang gisugyot nga pag-amendar sa ordinansa dili pa mapatuman dayon tungod kay ipaubos pa kini og pagtuon sa Committee on Laws, Ordinances, and Styling. — /IBM (BANAT NEWS)