Programa alang sa MSMEs sa Central Visayas gipalig-on

CEBU, Philippines — Gipalig-on sa Department of Trade and Industry (DTI) ug Department of Labor and Employment (DOLE) ang ilang mga programa alang sa micro, small and medium enterprises (MSMEs) sa Central Visayas.

Matud ni DTI-7 Senior Trade and Industry Development Specialist Gelo Escobilla gipakita sa magnitude 6.9 nga linog niadtong Septiyembre 30, Bagyong Tino ug epekto sa Middle East crisis nga gikinahanglan sa mga negosyo nga himuong bahin sa ilang operasyon ang disaster preparedness.

Sa assessment sa DTI sa 600 ka MSMEs, nakita nga dakong problema ang pagkahurot sa working capital ug kakulang sa disaster preparedness. Daghang negosyo ang nawad-an og imbentaryo, kagamitan ug oportunidad sa negosyo tungod sa mga kalamidad.

Gipahigayon sa DTI ang impact assessments, price monitoring ug financing caravans aron matabangan ang mga apektadong negosyo. Sa mga MSMEs nga nasurvey, 90 porsyento na ang nakabalik sa operasyon, bisan adunay uban nga partially operational pa.

Mokabat sa 93 ka MSMEs usab ang nangaplay sa Enterprise Recovery Financing sa Small Business Corp. human sa linog, diin mga P24 milyon nga loan ang naaprobahan.

Samtang, gilusad sa DTI Cebu ang pilot Business Resilience Project uban sa University of San Carlos aron tabangan ang MSMEs sa paghimo og mas komprehensibong resilience plans. Lima ka negosyo ang apil sa pilot project nga mahimong palapdan sa tibuok Central Visayas.

Sa bahin sa DOLE, gipatin-aw ni Adjustment Measures Program focal person Jill Marie Duero nga ang Adjustment Measures Program (AMP) usa ka proactive nga grant program alang sa MSMEs ug mga trabahante nga mahimong maapektuhan sa pagbag-o sa teknolohiya ug ekonomiya.

Ang AMP adunay tabang sa capacity building, business enhancement, just transition, product development, productivity incentives ug industrial peace. Ang pinansyal nga tabang mahimong moabot sa P500,000 hangtod P1.5 milyon depende sa sakop ug hugna sa proyekto.

Gamit usab sa DOLE ang TUPAD Tubag sa Kalamidad aron hatagan og temporary emergency employment ang mga naapektuhan sa linog ug bagyo, lakip ang paglimpyo sa mga dalan ug komunidad.

Giawhag sa DTI ang MSMEs nga mag-digitalize, magparehistro sa ilang negosyo ug mangita og access sa financing, training ug mentoring samtang sayo pa, imbes nga maghulat nga moabot ang krisis.

Gipadayag sa DTI ug DOLE nga ang disaster preparedness, digitalization, business formalization, skills development ug access sa financing kinahanglan mahimong integral nga bahin sa pagpadagan sa negosyo aron mas lig-on ang MSMEs batok sa umaabot nga kalamidad ug pagbag-o sa ekonomiya. — /MEL (BANAT NEWS)