Polis nga mi-processed sa lisensya sa nakigpinusilay nga ex-con gisusi

CEBU, Philippines – Si Police Regional Office (PRO-7) Chief Supt. Lani-O Neres mimando nga ipasusi sa kampo Crame kun nganong nakahupot og lisensya sa .45 kalibre ang ex-convict nga nalambigit sa pinusilay sa barangay Carreta niadtong milabay’ng gabii.

Sa nakuhang ebidensya sa kapulisan giingong usa ka police nga nadestino sa kampo Crame ang mi-proseso sa mga papeles ni Dindo Ancero.

Kini sama sa permit to carry firearms outside of residence ug lisensya niini nga pinetsahan og Pebrero 10, 2009, gisusi na karon sa CCPO ang kamatuuran sa maong lisensya.

Matud pa ni Sr. Supt. Patrocinio Comendador, director sa Cebu City Police Office nga ang usa ka ex-convict dili mamahimong makahupot og lisensya sa armas hinungdan nga kwestyonable kaayo ang pagkakuha niini og susamang dokumento.

Samtang drugas gyud maoy gitutukan sa imbestigasyon sa kapulisan sa dakbayan sa Sugbu subay sa nahitabong pinusilay sa mga ex-convict nga sila si Ancero ug Ronnie Lape diha sa may Ponce II Sitio Sto. Niño barangay Carreta niadtong Miyerkules sa buntag.

Dako ang iyang pagtoo nga ang grupo nagkabangi ug wala na magkasinabot pa sa ilang mga kita sa illegal drugs hinungdan nga sila nagpinusilay.

Samtang ilang apilon sa imbestigasyon pagsuta nganong naapil sa pagka-angol ang manghud ni Kapitan Eduardo Lauron nga si Natalio Lauron ug pag-umangkon niini nga si Romulo Ligan.

Miangkon si Comendador nga wala pay warrant of arrest si Ancero sa mga kasong pagpanulis niini dinhi sa Sugbu, siya gilambigit sa tulis sa A1 Financial Inc. ingon man tulis sa barangay Talamban.

Susihon pa usab pinaagi sa ballistics examination kun nagamit ba sa ubang krimen ang maong armas. - Guam Logroño (BANAT NEWS)