Mga estudyante pabinisay-on

CEBU, Philippines – Gisugyot ni Mayor Adelino Sitoy sa lungsod sa Cordova ang paggamit sa kaugalingong pinulongan nga Binisaya alang dinhi sa Sugbo, Tagalog alang sa Luzon, Hiligaynon alang sa mga Hilonggo ug uban pang nitibong pinulongan isip giya sa hingpit nga pagkat-on sa mga langyaw nga pinulongan nga naglakip sa English, Chinese, Spanish, Japanese ug uban pa.

Si Mayor Sitoy nga usa ka manlalaban, professor ug kanhi dean sa College of Law sa University of Cebu, mipadayag niini atol sa convention sa Association of Local Colleges and University (ALCU) nga gihimo dinhi sa Sugbo sa miaging adlaw.

Ang convention sa ALCU gitambungan sa mga 154 ka mga delegado nga naggikan sa mga kolehiyo ug unibersidad sa Luzon, Visayas ug Mindanao.

Si manlalaban Adel Tamano nga maoy presidente sa Pamantasan ng Maynila ug mao usab ang presidente sa ALCU maoy nangulo sa maong kalihokan nga gipahigayon sa Mandaue City College Campus sa barangay Jagobiao, dakbayan sa Mandaue. 

Dugang pa ni Sitoy nga gikinahanglan kaayo nga ang mga tinun-an karong panahona makamao usab sa pinulongang langyaw sanglit magamit man kini alang sa kalibotanong kalamboan .

Gitataw niya nga kun gikinahanglan man sa mga tinun-an ang pagkat-on sa mga langyaw nga pinulongan angay usab hunahunaon sa mga nagdumala sa mga tulunghaan nga gikinahanglan usab sa mga estudyante ang pagkat-on sa kaugalingon nilang pinulongan.

Si Mayor Sitoy miingon nga dinhi sa nasud murag gihimo na lamang nga second class citizen ang mga tawo nga dili kaayo hanas moiningles kay ang naandang giila   nga manggialamon mao man ang mga tawo nga larino moiningles.

Matud pa niya nga mahimong paspas ang pagkat-on sa mga tinun-an kun hatagan sila og kahigayonan nga mogamit sa kaugalingong pinulongan isip giya sa pagkat-on nila sa uban pang pinulongan. - Romeo T. Limpangog (BANAT NEWS)