Pagkiha ni Gwen sa 'Big 3' gihangop ni Rama

CEBU, Philippines – Saludo si Cebu City Acting Mayor Michael Rama sa gihimong lakang ni Gobernadora Gwendolyn Garcia pagpasaka og reklamo ngadto sa Department of Justice (DOJ) batok sa tulo ka higanteng kompanya sa lana dinhi sa nasod.

Gusto sa gobernadora nga kasilutan ang Pilipinas Shell Petroleum Corporation, Petron Corporation ug Chevron Corporation tungod sa giingong kalapasan niini sa Akta Republika 8479.

Ang nahisgutang balaud nga gitawag usab og Downstream Oil Industry Deregulation Act of 1998 magsilot niadtong mokontrolar ug mopaburot sa presyo sa lana. Matud pa ni Rama nga angayan lang hangpon ang gihimo ni Garcia tungod kay apektado usab ang mga molupyo sa siyudad sa taas nga presyo sa mga produktong petrolyo. “It is something that the entire province will be affected and it does not spare Cebu City, so, that’s why it is something appreciated,” sumala ni Rama. Gani lakip ang acting mayor nga nahibulong kun nganong taas ang presyo sa lana dinhi sa Sugbu itandi sa ubang dapit sa nasod.

Sa gihimong comparative presentation ni Garcia nasuta nga mas taas ang presyo sa lana sa Sugbu itandi sa Manila, Ilo-Ilo ug sa dakbayan sa Davao. Dunay gihimong pagpasabot ang mga representante sa mga oil companies niini apan wala matagbaw si Garcia niini ug gihinayon ang iyang pagsang-at sa reklamo.

Buot hinuon sa acting mayor nga masayod sa kinatibuk-ang complaint sa gobernadora ug iyang ikalipay kung mahatagan siya og kopya niini. Kini aron masuportahan sa kagamhanan sa dakbayan ang nahisgutang lakang kung makita ni Rama nga kini dunay sukaranan. Nasayran usab nga ang gihimong lakang ni Garcia gihangop usab sa nagkadaiyang grupo partikular na sa transport sector. - Elly Bolonos (BANAT NEWS)