Kabahin sa polio victim dunay kauban ang Papa paglabay sa Bata

CEBU, Philippines – Human makaplagi ang patay’ng lawas sa anak ni Arsenio Trasmil nga si Michael didto sa fishpond sa sitio Kanipaan, Basak-Pardo gisusi karon sa kapolisan ang impormasyong dunay kaubang laing tawo si Trasmil nga nakigyayong kaniya aron ilabay ang bata nga ilahang gisulod sa sako.

Nagduda ang kapolisan nga wala mag-inusara ang amahan sa paglabay sa biktima.

Sa pakighinabi sa mga tigbalita kagahapon, si Sr. Supt. Patrocinio Comendador nagkanayon nagduda sila kang Trasmil tungod kay wala magkadimao ang pamahayag niini ngadto sa media.

Sa pagkakaron, wala pa ma-autopsy ang lawas sa biktima apan matud pa ni Dr. Nestor Satur, medico legal sa PNP Crime laboratory nga wala sila’y nakitang fracture o ba kaha samad sa lawas sa biktima.

Dungag pa ni Comendador nga karong adlawa ipasaka ang kasong violation of Republic Act 7610, kun kasong child abuse kang Trasmil human nila hisayri ang pag-tratar niini sa biktima.

Kini sama sa pagbutang kaniya og laing pinuy-anan ug gipasagdan ra nga nag-inusara bisan paman sa kahimtang niini.

Ang amahan sa unang pakighinabi sa mga sakop sa media nangangkon nga nasakit ang iyang anak ug dili na modawat og pagkaon ang ginhawaan niini hangtud nga kini namatay niadtong Abril 24.

Gumikan sa kawad-on ug walay ikabayad sa paghatag kaniya og desenteng lubong nakadesider kining isulod nalang kini sa sako ug ilabay diha sa maong fishpond, nianang pagkasunod adlaw nakaplagan kini sa mga batang nangahoy.

Matud pa ni Comendador nga dili sila makapasaka og kasong parricide tungod kay taas ang proseso niini ug wala pay igong ebidensya nga makapamatuod sa ilang mga pagduda batok kang Trasmil. - Lovers Lyn Yangyang (BANAT NEWS)