2 kawani sa Talisay 'sakpang' nag-sex

CEBU, Philippines – Duha ka job orders sa city hall sa dakbayan sa Talisay nga nadestino isip landscapers sa parke sa barangay Poblacion ang gipahunong una sa pagtambong sa ilang trabaho tungod sa gihimong imbestigasyon kabahin sa pasangil nga nasakpan silang naghilawas sulod sa multi-purpose building diha sa parke sa maong dakbayan.

Ang maong insidente nahitabo niadto pang Martes sa hapon dihang upat ka mga batang lalake ug babayeng nagpanuigon og otso ug 12-anyos nga nagduwa og tago-tago maoy nakasakop kanila.

Ang mga giimbestigahan mao ang 48-anyos nga taga barangay San Roque ug usa ka hamtong nga babaye nga taga barangay Lawaan III sa maong siyudad apan pulos mga minyo.

Ang apuhan sa usa sa upat ka mga bata sa pakighinabi niini sa Banat News mibutyag nga human nila isumbong sa kapolisan ang gihimo sa duha ngadto sa kapolisan gibaharan sila sa 48-anyos nga lalaki nga ikiha tungod kay nagpataka sila og pamasangil.

Ang maong mga bata ang mibutyag ngadto kang PO1 Jovelyn Genio kinsa maoy mipahigayon sa imbestigasyon kabahin sa law-ay nga gibuhat sa duha ka mga suspetsado.

Ang 48-anyos nga suspek dihang gikuhaan sa Banat News kagahapon mihimakak sa mga pasangil batok nilang duha.

Matud pa niini gikan silang nag-inom sa maong ginang ug nag-iyahay og panglakaw, ang babaye miadto sa pikas building ug nag-ilis samtang siya usab diha mag-ilis sa pikas nga building.

Ang duha ka multipurpose buildings nag-atbang lang kini nga nahimutang diha sa parke sa barangay Poblacion.

Si Nila Tapio kinsa maoy head sa duha mibutyag sa Banat News nga iyaha nang gipahibalo ngadto sa Human Resource Department (HRD) ang maong report.

Si Emily Cabrera pangulo sa HRD nagkanayon nga gi-hold niya ang punch cards sa duha ug ipaubos sila sa imbestigasyon. – BANAT NEWS