Power plant audit suportado sa Global

CEBU, Philippines - Gisuportahan sa presidente sa usa ka dakong power firm sa Cebu ang panawagan ni Fr. Francisco Silva sa National Electrification Administration (NEA) nga ipailawom sa audit ang tanang power plant sa Cebu aron malikayan ang power outage sa lalawigan.

Si Jesus Alcordo, presidente sa Global Business Power Corporation, ang umbrella company sa Toledo Power Company, nagkanayon nga ang “full audit” sa mga planta sa kuryente makaayo sa ekonomiya sa Cebu.

Apan gisugyot ni Alcordo nga angayang palapdan ang power audit aron apilon sa pagsusi ang tanang mga hinungdan sa suliran sa kakulangan sa suplay sa kuryente.

Sumala pa niya nga dili lamang ang maintenance sa mga planta ang ipa-ubos sa audit.

Angayan usab susihon ang reserve capacity nga gi-require sa regulasyon aron makaabot kini sa nagkadakong power demand sa lalawigan, si Alcordo nagkanayon.

Angayan usab tun-an ang electricity rate sa rehiyon nga gitupong sa time-of-use rates sa National Power Corporation, nga matud ni Alcordo, wala magtug-an sa tinuod nga “cost of generation.”

Usa usab sa rason mao ang “baseload capacity” sa rehiyon nga naggikan sa mga karaan na kaayong mga power plant, sama sa Toledo Power Corporation coal-fired power plant nga hapit na mo-30 ka tuig sa operasyon.

Matud niya nga bisan gastohan og dako ang mga karaan nga planta sama sa TPC nga gigastohan na og P200-milyones alang sa rehabilitasyon, dili gihapon kini garantisado.

Gipasalig hinuon ni Alcordo nga ang 246-megawatt nga clean coal power plant nga gipabarog karon sa dakbayan sa Toledo pinaagi sa Cebu Energy Development Corporation nga consortium sa Global, Aboitiz Power Corporation, Vivant Energy Corporation ug Formosa Heavy Industries Corporation, makatabang kini pagtubag sa suliran sa kuryente sa tibuok probinsiya sa Cebu.

Gipahibalo usab ni Alcordo nga nagsugod na usab sila og pangita unsa nga “renewable source of energy” nga ilang magamit pag-produce og elektrisidad. – BANAT NEWS