Premyo sa Baroto Regatta giandam na

CEBU, Philippines - Gibutyag sa tsirman sa City Fisheries and Aquatic Resources Management Council (C-FARMC) nga si kanhi Custom District Collector David Odilao nga dunay gamay'ng problema kabahin sa premyo sa Baroto Regatta tungod kay wala pa ma-release ang tseke nga gihatag gikan sa kagamhanan sa dakbayan, probinsiya sa Sugbo ug kang Kongresista Eduardo Gullas.

Matud niini nga mangita siya og kakuhaan og pundo alang sa iabuno sa mga premyo ug ubang gastohan samtang wala pa maabot ang nahisgutang tseke apan wala gibutyag ni Odilao ang kantidad sa salapi nga gihinabang.

Sa gagmay'ng galastohan si Odilao nagkanayon nga siya lang una ang miabuno.

Sa laing bahin, mga mosalmot sa Baroto Regatta ang gilauman nga madugangan pa niining adlawa matud sa nagpasiugda niini nga si Odilao.

Si Odilao sa pakighinabi niini sa Banat News kagahapon nagkanayon nga niadtong Martes mikabat na sa 30 ka baroto ang nagpalista nga moapil sa lumba apan gilauman nilang madugangan pa kini niining adlawa.

Kasagaran sa mga nagpalista mga mananagat sa Talisay, dunay taga lungsod sa Sogod, Cordova ug Lilo-an ug duna pay nagpareserba.

Hangtud sa alas 7:00 sa buntag karong adlawa bukas pa ang pagpangrehistro sa mosalmot sa lumba.

Gibutyag ni Odilao nga duna untay buot mosalmot nga taga isla sa Bohol apan wala nila kini dawata tungod kay province wide lang ang maong lumba.

Ang assembly area sa maong lumba anha diha sa Tourist Seaside Hotel sa barangay Poblacion ug ang registration area diha sa sitio Litmon duol sa nahimutangan sa nahisgutang hotel. - Brenda D. Batuto (BANAT NEWS)