Taga Talisay seminaron bahin sa marine law

CEBU, Philippines - Tungod sa kakuwang sa alamag bahin sa Marine Law ang mga opisyal sa dakbayan sa Talisay nagpahigayon og learning session kagahapon sa buntag diin maoy ilang dinapit ang mga opisyal sa Bureau of Fisheries and Aquatic Resources (BFAR) ug uban pang ahensya sa gobyerno nga may labot sa maong isyu.

Si Konsehal Shirley Belleza mibutyag sa Banat News nga ang nahitabo sa Lagundi Reef dili gamay nga isyu, hinungdan nga gihangyo niya ang presiding officer nga si acting Vice Mayor Alan Bucao nga maoy mo-imbitar sa mga tawo nga naggikan sa mga ahensiya sa gobyerno nga suhito sa Marine Law.

Matud niya nga karong alas 3:00 sa hapon mopahigayon sila og special session aron mapasar ang resolusyon nga nag-awhag sa tukmang ahensiya nga mopahigayon og marine inquiry sa nahitabo sa Lagundi Reef.

Si Bucao usab mibutyag sa mga tigbalita nga ang mga opisyal sa kagamhanan sa Talisay walay kaalam bahin sa Marine Law hinungdan nga mipahigayon sila og learning session.

Iyang gipasabot nga ang maong learning session gitumong aron sa pag-edukar kanila sa tinguha mapahamtangan og bug-at nga silot kadtong mga tawo nga makabuhat og kalapasan.

Kahinumduman nga ang mga gasang sa fish sanctuary o Lagundi Reef sa Talisay nangadugmok ug nagusbat dihang ang barko nga M/V United Majuro nga usa ka barko sa Greece nga gisakyan og mga Insek, misangad sa maong lugar.

Kumo kay mao ray balaod sa Talisay nga kutob sa makataak sa Lagundi Reef ug makadaot sa mga gasang niini igo lang pamultahon og P5,000, dali ra kaayong gibayran a ng maong kantidad sa kapitan sa barkong nasangad nga giilang si Cheng Guangming, usa ka Chinese national .

Human kini makabayad sa maong multa puwerting dalia nakasibat sa maong Insek   dala ang ilang barko pahilayo sa Talisay.

Hinuon si Cheng mitanyag usab og US$10,000 nga donasyon alang sa dinalian nga rehabilitasyon sa Lagundi.

Sa laing bahin si Atty. Benjamin Canbrido, faculty member sa University of San Jose Recoletos College of Law ug nag-practice kabahin sa Marine Law mitanyag og libreng serbisyo ngadto sa Talisay kinsa siya maoy mobarog nga manlalaban sa kasong ipasaka sa dakbayan batok sa nakabuhat og kalapasan.  - Brenda D. Batuto (BANAT NEWS)