Mga kan-anan susihon

CEBU, Philippines - Sugdan na niining semanaha sa Cebu City Disaster Coordinating Council (CCDCC) ug sa City Health Department ang pagsusi sa tanang kan-anan dinhi sa dakbayan.

Kini aron sa pagsuta kun nakatuman ba ang mga kan-anan sa mga rekisitos nga gikinahanglan sama sa sanitary permit ingon man sa business permit.

Matud sa chairman sa CCDCC nga si Konsehal Gerardo Carillo nga kadtong mga kan-anan nga ilang madiskubrehan nga walay permit ila dayong pasirad-an.

Gitataw ni Carillo nga tugutan lang nila nga makabukas og balik ang mga kan-anan kun natuman na niini ang mga gikinahanglan sa ilang negosyo.

 “Mao na nga kadtong mga eateries o kan-anan nga wa kakompleto sa requirements, magpakisayod na sila sa City Health nato,” sumala ni Carillo.

Nahuna-hunaan sa konsehal ang pagpahigayon og inspeksyon human masayod nga dunay daghang mga kan-anan sa dakbayan nga walay mga permit.

Gipadayag ni Carillo nga angayan lang masusi ang nagkadaiyang eateries sa siyudad aron maprotehian usab ang mga kustomer niini.

Nasayran sa Banat News nga lakip sa ni-operate nga walay sanitary ug business permit mao mismo ang canteen diha sa Cebu City Legislative Building.

Ang tagdumala sa nahisgutang canteen gihatagan og hangtud niadtong Marso 7 pagtuman sa gikinahanglang mga rekisitos.

Wala pa matino kung natuman ba sa tag-iya ang mga requirements nga nalatid sa sanitation code sa dakbayan sulod sa gihatag nga tagal.

Apan matud ni Carillo nga dili nila labyan ug lakip nga susihon sa inspection team ang maong canteen nga gidumala og pribadong tawo.

Ang nahisgutang canteen gitugotang makaabli ug makasugod sa operasyon niadtong miaging Enero 7 taliwa sa kakuwang sa mga requirements.

Basi sa nalatid sa Presidential Decree 856 (Sanitation Code of the Philippines) ingon man sa City Ordinance 676 (Sanitation Code of Cebu City) nga walay business establishment partikular na sa mga kan-anan ang tugutang maka-operate kung walay sanitary permit. - BANAT NEWS