Ruiz mopasusi kang Jonas

CEBU, Philippines -  Ipaimbestigar ni Cebu 6th District Congresswoman Nerrisa Soon Ruiz si Mayor Jonas Cortes sa Mandaue City gumikan sa pagpakaon sa mga tawo nga misaksi sa pagduaw ni kanhi Presidente Joseph "Erap" Estrada sa Balay Lungsod sa dakbayan sa Mandaue sa milabay’ng adlaw nga gigastohan sa kwarta sa kagamhanang lokal sa maong dakbayan.

Si Ruiz gilaw-ayang naminaw sa mga pamahayag ni Erap nga nagpunay og saway sa administrasyon ni Presidente Gloria Macapagal Arroyo atol sa pakigpulong niini atubangan sa City Hall nga gitambongan sa tanang kawani sa dakbayan agi’g pagsanong sa mando ni Mayor Jonas Cortes.

Napungot si Ruiz kay matud pa gipasagdan lang ni Cortes si Estrada nga miatake pag-ayo batok kang Presidente Arroyo.

Ang labing nalagotan ni Ruiz mao ang paggasto ni Cortes sa kuwarta sa katawhan sa Mandaue kay gipalit og pagkaon ngadto sa mga katawhang naminaw kang Estrada.

Apan dali kining gipanghimakak ni Atty. Briccio Boholst, ang City Administrator sa dakbayan sa Mandaue kinsa mihagit kang Ruiz sa pagpakita og ebidensya niining iyang pasangil batok kang Cortes.

Matud pa ni Boholst nga kasagaran na nilang gihimo ang pagpakaon sa mga dagkong tawo nga moduaw sa dakbayan sa Mandaue sama sa ilang gihimo ngadto kang Estrada.

Tungod niini mibahad si Ruiz nga ipaimbestigar niya si Cortes sa Commission on Audit. - BANAT NEWS