Raul - Tomas giduso sa mga kapitan sa city

CEBU, Philippines - Duna nay gipapirmahang manifesto si Kapitan Nilo Tariman sa barangay Pit-os ngadto sa iyang mga kaubang kapitan sa kabarangayan sa dakbayan sa Sugbu nga pagsuporta nilang North District Rep. Raul del Mar ug mayor-on-leave Tomas Osmeña alang sa pagkamayor ug bise mayor sa siyudad sa sunod tuig nga eleksyon.

Matud ni Tariman nga ubay-ubay na sa mga barangay kapitan nga iyang gipahibawo ang mipadayag og pagsuporta sa manifesto, kini iyang itunol ngadto kang Osmeña sa pagbalik niini sunod semana.

Nagkanayon si Tariman nga gusto lang niyang ipakita ngadto kang Osmeña nga daghang barangay kapitan sa dakbayan ang wala makauyon kang acting mayor Michael Rama.

Ang acting mayor uban kang Joy Augustus Young giduso na ni Osmeña nga maoy standard bearer sa Bando Osmeña Pundok Kauswagan (BOPK) sa 2010 elections.

Gitataw ni Tariman nga anaa ra kang Osmeña kung sagupon o ibasura niini ang ilang sugyot alang sa gitakdang piniliay sunod tuig apan giklaro sa kapitan nga kung isalikway ni Osmeña ang ilang manifesto, andam silang mobuwag sa BOPK kung pakalawaton sa kandidatura unya ni Rama.

Gipadayag ni Tariman nga dili sila kombinsido sa pagpadagan sa acting mayor sa dakbayan hinungdan nga sila dili mosuporta niini.

“Nakita namo karon nga dili man maayo pagdala ang siyudad ubos ni Rama kadto ganing kontrobersiya sa Miss Cebu wala man gani siya kasulbad ato,” sumala ni Tariman.

Samtang nagdumili paghatag sa iyang komentaryo si ABC president Eugenio “Jingjing” Faelnar sa gihimong lakang ni Tariman ug kaubanan.

Tambag sa ABC president ngadto sa iyang mga kaubang kapitan nga magpaabot lang og mosunod sa ilang giila nga pangulo sa grupo nga si Osmeña. - Elly Bolonos (BANAT NEWS)