Spy-cam gitaod sa City Hall para sa mga tabian

Cebu - Dili na unya makaikyas ang mga ligoy partikular na niadtong magpunay ra og tabi panahon sa tingtrabaho sa Cebu City Hall tungod sa gitaud nga napulo ka security cameras nga mo-monitor sa mga kawani ingon man sa mga tawo nga mosulod sa City Hall.

Matud ni Konsehal Roberto Cabarrubias nga ila na karong gisugdan ang test run sa bag-o lang giinstalar nga mga camera ug kini giingong mahingpit nang operational sunod semana.

Ang konsehal nga maoy chairman sa Committee on Information Technology sa City Council nipahibawo nga ang mga camera dunay mga amplifiers ug sound systems.

Kini nagpasabot nga makadungog sa transaksyon sa mga tawo diha sa City Hall ingon man niadtong mga empleyado.

Sa samang higayon madungog usab ang mga opisyal sa City Hall ngadto sa hingtungdang departamento kung kini dunay ipadangat nga mensahe.

“Ako man ning butangan og public IP, naay usa ka camera niini nga akong i-link sa Internet, so, sayon na lang unya kung duna kay access sa internet,” sumala ni Cabarrubias.

Gani niingon ang konsehal nga bisan si Mayor Tomas Osmeña nga tua sa Amerika, mahimo gihapong makakita ug makadungog sa mga transaksyones diha sa City Hall.

Gitataw hinuon ni Cabarrubias nga ang maka-access lang niini mao ra usab kadtong mga opisyal o mga tawo nga dunay Internet Protocol Address (IP Address).

Nagtuo ang konsehal nga pinaagi sa mga security camera, makugihan na unya ang badlungon nga mga kawani sa City Hall ug mag-amping na sa ilang pagtrabaho.

“Dili na gyud sila makaligoy-ligoy kay makit-an man nato kung unsay ilang gipangbuhat sa ilang tagsa-tagsa ka buhatan,” nagkanayon si Cabarrubias.

Miingon ang konsehal nga dugang mga security camera ang paliton unya sa kagamhanan sa dakbayan ug kini itaud usab diha sa Cebu City Legislative Building. – BANAT NEWS