One-stop shop sa business permits sa Liloan gihangop sa mga negosyante

CEBU - Ang lokal nga kagamhanan sa lungsod sa Liloan nagbutang og one-stop shop aron sayon nalang ang pag-renew sa mga business permits sa mga negosyante.

Si Mayor Vincent Frasco sa lungsod sa Liloan miingon nga pinaagi niini, dili na mahasol ug malangay ang processing sa pag-renew sa mga business permits.

“The convenience offerred to business will also translate into more revenue for the municipality pa ni Frasco.

Ang maong programa inabagan sa Department of Trade and Industry and the German Agency for Technical Cooperation.

Usa ka Pascasio Onsines, 69, nga usa sa mga entrepreneur sa maong lungsod dako ang pasalamat sa lokal nga kagamhanan sa maong programa.

“Maayo ni kay dali, simple,” nagkanayon si Onsines.

Si Onsines nibayad og P2 mil sa renewal sa permit sa iyang gamay nga tindahan apan matud niya, dili kini niya igsapayan ang maong kantidad ilabi na kay ang proseso simple kaayo.

Matud ni Onsines igo lang niya gipil-apan ang application sa renewal form ug gi-attach sa barangay clearance aron masayran kung pila ang bayrunon.

Nipasabot si Hammurabi Bugtai, business permit and licensing officer nga sa maong sistema ang mga aplikante ug ang munisipyo makadaginot sa oras.

Matud ni Bugtai ang sayon nga proseso alang sa mga aplikante sigurong ang collection sa lungsod maayo og dagan.

Sa miaging tuig ang lungsod nakakolekta og P5 milyones nga kita sa business permits gumikan lang sa one-stop shop. Ang maong kita gidoble kung itandi sa nangaging mga katuigan.

Ang one-stop shop makaatiman og 100 ngadto sa 200 ka mga aplikante kada adlaw kinsa ang mga departamento nga concerned naglakip sa police, engineering, health ug uban pang buhatan.   (BANAT NEWS)