Kapitan sa Pasil wa gihapon mouli gikan sa Amerika

CEBU - Barangay kapitan sa pasil wala pa gihapon mouli bisan kun napupos na ang tagal sa pagbakasyon niini didto sa Estados Unidos.

 Nasayran nga tulo ka buwan ra ang nalatid sa travel order sa kapitan nga gipirmahan ni Mayor Tomas Osmeña.

 Ang kapitan milarga ngadto sa Amerika sa ikaduhang semana sa buwan sa Agosto, apan hangtud niining higayona kini wala pa mahibalik sa Sugbu.

 Butang nga nakapahibulong sa iyang mga konstituwente kun kini mobalik pa ba sa ilang barangay ug moalagad sa mandato nga ilang gihatag niini.

 Gipahibawo hinoon sa numero unong kagawad sa Pasil ug maoy officer-in-charge sa barangay, Felipe Cabonilas, nga moabot na ang ilang kapitan sunod semana.

 Apan nagduda ang nagpakabana nga mga molupyo sa Pasil tungod kay unang gipahibawo sa mga opisyal sa barangay nga niining buwana mobalik ang kapitan.

 Sa pikas bahin gipadayag ni Cebu City DILG Director Patricio Gabuya nga gikinahanglan nang modesisyon ang konseho sa barangay sa maong hisgutanan.

 Matud ni Gabuya nga mahimo na ang mga opisyal sa barangay maoy mangayo sa DILG og extension sa pagbakasyon ni Ocarol.

 Midugang si Gabuya nga mahimo usab nga ideklarar sa konseho sa barangay nga wala mosunod si Ocarol sa leave application niini.

 Wala hinuoy plano si Cabonilas nga magkigtagbo sa iyang mga kauban sa konseho ug mosunod sa bisan asa sa duha ka sugyot ni Gabuya.

 Nagkanayon si Cabonilas nga sila magpaabot lang sa imando unya sa DILG kun unsa ang angayan nilang buhaton.

Dako ang pagduda sa mga molupyo sa Pasil nga wala mobakasyon si Ocarol kun dili kini nanarbaho ngadto sa gawas sa nasud. - Elly Bolonos (BANAT NEWS)