Gov. Garcia molibot sa SRP

CEBU - Sugdan na ni Gobernadora Gwendolyn Garcia karong adlawa ang iyang tulo ka adlaw nga Suroy-Suroy Sugbu 2008 Southern Heritage Trail.

Apan sa dili pa duawon sa gobernadora ang kapin sa 20 ka mga siyudad ug lungsod sa probinsya, unahon niini pagsuroy ang South Road Properties (SRP).

Ang maong kasayuran hilom nga gipahibawo kagahapon ni Capitol Consultant on Information nga si Rory Jon Sepulveda.

Kini dihang nakig-alayon ang Capitol consultant kang City administrator Francisco Bimbo Fernandez alang sa pagbisita ni Garcia diha sa SRP.

Matud ni Sepulveda nga gusto sa gobernadora nga motan-aw sa dapit nga interesadong paliton sa Filinvest Land Incorporated (FLI).

Kini aron ilang matino kung angayan ba nga palabwan og dako sa kagamhanan sa lalawigan ang presyo nga gitanyag sa Filinvest niini.

Sa samang higayon miingon si Sepulveda nga gusto usab nilang mapangandaman ang ilang proposal ngadto sa kagamhanan sa dakbayan.

“Gusto ni governor nga personal gyud nga matan-aw ang 10 ektaryas nga paliton sa Filinvest aron makaandam mi sa competitive bidding,” sumala ni Sepulveda.

Ang Filinvest gikatahong nitanyag pagpalit sa napulo ka ektarya diha sa SRP sa kantidad nga muabot sa P2 bilyones.

Apan niingon si Sepulveda nga andam ang kagamhanang probinsyal sa pagpalabaw sa nahisgutang tanyag atol unya sa bidding.

Dunay mga pagduda nga ang lakang sa Kapitolyo maoy usa ka pagbulabog sa tinguha sa siyudad pagbaligya sa SRP.

Kini kusganon hinuong gipanghimakak sa Capitol consultant ug andam nilang pamatud-an nga ang Kapitolyo seryoso sa plano niini.

Gani kagahapong adlawa, ang provincial government pormal nang nipadangat sa ilang tinguha sa SRP, pinaagi sa suwat nga gipadala ni Sepulveda ngadto kang Fernandez.

Apan gipadayag ni Fernandez kinsa mao usab ang chairman sa Joint Venture Selection Committee nga sila dili pa modawat og laing tanyag niining panahuna.

“Unfortunately, we cannot negotiate anybody else until we finish our negotiation with Filinvest,” nagkanayon si Fernandez.

Gilauman hinuon sa city administrator nga matapos na ang ilang negosasyon tali sa Filinvest karong Lunes sunod semana.

Gitataw ni Fernandez nga sila gitugutan lang nga makignegosasyon sa ubang mga interesado kung ilang ibasura ang proposal sa Filinvest.

Sa samang higayon kung maaprubahan ang proposal sa nahisgutang investor, ila gilayong andamon ang bid documents ug ipublikar sa nasudnong pamantalaan.

Niining higayuna, mahimo nang makaduso sa ilang proposal ang kagamhanang probinsyal nga tun-an usab sa Joint Venture Committee.

Gipadayag hinuon ni Sepulveda nga wala sila magdali sa ilang tuyo ug andam silang magpaabot sa tukmang panahon pagduso sa ilang proposal. – BANAT NEWS