Villar mi-resign pagka-Senate Pres.

CEBU - Mi-resign sa pagkapangulo sa Senado si Senador Manuel Villar kagahapon sa hapon human sa kinalit nga gihulagway nga kudeta diha sa Senado nga miresulta sa botasyon sa mga miyembro aron siya tangtangon gumikan sa mga isyung gibato ngadto kaniya.

Sumala pa sa report sa GMANews.TV sa wala pa pormal moabli ang sesyon giunhan na ni Villar ang mga kaubanan kabahin sa mga estoryang mikatap nga gamay nalang ang nagsuporta kaniya.

“My dear colleagues in this august chamber, the tenure of the Senate President - as everyone knows - depends on the number of members that supports him or her. I was informed this afternoon I no longer have the support of majority of my colleagues,” matud pang Villar.

“I therefore tender my resignation and congratulate the new senate President, Honorable Juan Ponce Enrile,” pamahayag pa niini kinsa mipasalig nga suportahan niya ang Senado aron magpabiling independente ang reputasyon sa maong ganghaan.

Mipadayag kining mas mahimo siyang epektibo isip “fiscalizer” sa Senado ug mas mapaduol siya sa mga tawo karong di na siya Senate President.

Human tak-upi ni Villar ang sesyon gi-nominate ni Sen. Panfilo Lacson si Enrile isip Senate president. Sa 23 ka senador 14 ang mibotar kang Enrile, lima ang mi-abstain.

Si Sen. Gregorio Honasan maoy mipahurar kang Enrile sa maong posisyon.

Sa sayo pa napanid-an sa   pipila ka mga senador nga panagsa nalang motunga si Villar sa ilang mga sesyon.

Kini human siya pasanginli ni Lacson nga nalambigit sa kontrobersya sa double budget allocation sa C5 Road project nga gipanghimakak usab ni Villar. (Report gikan sa GMANews.TV) (BANAT NEWS)