Vendors ug brgy. officials naglamok

CEBU - Dunay nasinating gamay’ng tensyon tali sa mga opisyal sa barangay Santo Niño ug mga sidewalk vendors diha sa dalan M.C. Briones ning siyudad sa Sugbu kagahapon human babagi sa barangay nga makatukod sila sa ilang mga tindahan sa maong dapit.

Kagahapong adlawa duha ka trak sa kahoy ang niabot diha sa maong dapit aron unta gamiton pagpatukod og mga structures sa kapin sa 40 ka mga manindahay.

Ang nahisgutang mga vendors giingong mga sakop sa Cebu Market Vendors Development Cooperative (Cemvedco) ni Ermita barangay councilor Erwin Goc-ong.

Apan daling niabot ang mga opisyal sa barangay pinanguluhan ni kapitan Pancho Ramirez Sr., hinungdan nga napakgang ang laraw sa mga vendors.

Apan miinsister ang mga vendors nga may pagtugot na sila gikan ni urban poor consultant Gerry Marquez ug ni acting mayor Michael Rama sa pagtukod sa mga stalls.

Apan pakyas ang mga vendors pagpakita og dokumento ngadto kang Ramirez ilabi na ang permit niini pagtukod og mga esktraktura hinungdan nga mitumaw ang lamok-lamok tali sa duha ka habig.

Napakgang ra kini human moabot ang mga polis hinungdan nga nanawag og police assistance si kapitan Ramirez.

Matud ni Erwin Goc-ong, presidente sa Cemvedco nga wala na lang sila moinsister apan ila gihapong ipadayon ang ilang tinguha.

 “Nanawag man sila og mobile patrol unya dili man ko gusto og gubot, dili pareha niya (Ramirez) nga isog kaayo, ni lie low lang ko,” sumala ni Goc-ong.

Matud pang Goc-ong pakigkitaan niya ang mga opisyal sa siyudad aron mahatagan og pormal nga pagtugot ang iyang mga sakop makatukod og tindahan sa maong lugar.

Nasayran nga ang apektadong mga vendors boluntaryong niguba sa ilang mga tindahan dihang gitrabaho ang drainage system sa Cebu City Legislative Building.

Apan karon nga nahuman na ang maong proyekto, gusto ni Goc-ong nga pabalikon na ang iyang mga sakop sa ilang kanhi nahimutangan sigon sa nasabutan.

Butang nga kusganong gibabagan sa mga opisyal sa barangay pinaagi usab og pagpalabang og resolusyon nga ilang gipadangat ngadto sa City Council.

Gipadayag ni kapitan Ramirez nga iyang pabantayan sa mga tanod 24 oras ang nahisgutang dapit aron dili makahigayon ang mga manindahay sa ilang laraw.

Ang maong lakang gihulagway ni Goc-ong nga dili makitawhanon tungod sa pagpiit niini sa iyang mga sakop nga nangita og kapanginabuhian.

“Wala ko kasabot anang tawhana, among patambungon sa among mga tigom dili motunga unya karon nga motukod na mobabag siya,” matud ni Goc-ong. - BANAT NEWS