Midunggab kang Joavan Fernandez nagdala'g granada, nanghagis

CEBU - Suspek sa pagdunggab sa anak ni Mayor Socrates Fernandez nga si Randy Bazar gipasanginlang nanghagis na usab ug nagbitbit og granada diha sa sitio Magay sa barangay Tanke dakbayan sa Talisay niadtong Miyerkules sa gabii.

Ang 30-anyos nga si Bazar gipasanginlan usab niadtong adlaw’ng Martes nga maoy mipusil sa babayeng silingan nga si Maria Julia Macaraya nga giingong iyaha rang natripingan.

Usa ka silingan sa suspek ang mitawag og polis human makit-ing naglaroy-laroy si Bazar sa ilang lugar ug nanghasi ug nihulgang paulbuhon ang dapit sa iyang gibitbit nga granada.

Ang kapolisan sa dakbayan pinangulohan ni Senior Inspector Jovito Canlapan, officer in charge sa Talisay City Police Station ang daling miresponde sa lugar apan wala na diha ang suspek.

Sumala pa sa mga residente niana pang Martes sa buntag nagpunay og panghasi ang suspek ug nagdala usab kini og sundang ug nanghagad og buno sa mga silingan. - Brenda Batuto (BANAT NEWS)