Milabang amahan gipusil sa silingan

CEBU - Usa ka amahan ang gipusil patay sa managbayaw niyang silingan human kini misuway og laban sa anak nga gitabangan og kulata sa duha diha sa sitio Banana chapter, Magsaysay Hills Poblacion siyudad sa Toledo niadtong Huwebes sa alas 8:00 sa gabii.

Wala na kaabot nga buhi sa tambalanan ang biktima nga si Vicente Intes, molupyo sa nahisgutang lugar human kini maigo og bala diha sa walang bahin sa dughan.

Samtang ang mga suspek mao ang managbayaw’ng sila si Marlon Latoza, usa ka security guard ug sakop sa Equitor Knights Detection Security Agency ug Roger Sampayan, pulos molupyo sa nahisgutang lugar.

Matud pa ni PO1 Celso Makidatu sa Toledo City Police dihang nahinabi sa Banat News ang mga suspek kalit lang nisulong sa pinuy-anan sa biktima ug dayon gitabangan og kulata ang anak sa biktima diha sa gawas.

Ang biktima nga nakamatikod sa komosyon sa gawas sa ilang balay nagdali kining migawas aron pagsusi apan paghiabot niini sa gawas nibunot og armas ang usa sa mga suspek dayung diretso og pusil sa biktima.

Human matumba ang biktima daling miikyas ang mga suspek samtang gidali og dala sa Toledo City Hospital si Intes apan gideklarar kini nga dead on arrival (DOA). – BANAT NEWS