Legarda magpresidente?

CEBU - Gibutyag ni Senador Loren Legarda nga andam siyang modagan og mas taas nga posisyon karung umaabot 2010 national ug local elections.

Kini maoy iyang giingon kagahapon sa buntag atol sa press conference diha sa Uno restaurant sa Waterfront hotel and Casino diha sa Lahug ning dakbayan kinsa siya maoy pinasidunggang dinapit sa inagurasyon sa Cebu CFI Cooperative building nga nahimutang sa duol sa Provincial Capitol.

Nagdumili hinuon siya pagbutyag kung unsang posisyon iyang daganan apan duna nay mga pagdudang naglaraw siyang modagan pagkapresidente sa nasud.

Nagtoo si Legarda nga ang katawhan mismo maoy motuboy kaniya sa maong posisyon ug sa pagkakaron ihikling una niya ang maong plano ug tabangan ang nasinating krisis sa panalapi didto sa Amerika nga posibleng makaapekto sa nasud.

Dako hinuon ang pagtuo ni Legarda nga makabarog pa gihapon ang nasud kung dunay financial meltdown.

Samtang kabahin sa impeachment complaint sa anak ni kanhi house speaker Jose De Venecia nga si Jose De Venecia Jr. kagahapon batok ni Presidente Gloria Arroyo, ang senadora nagkanayon nga maglisod na og prosper ang plano gumikan kay mubo nalang kaayo ang panahon ug hapit na usab ang piniliay karung 2010.  (BANAT NEWS)