Trabahante nag-videoke giluba sa dughan, patay

CEBU – Patay ang usa ka trabahante nga gidunggab sa iyang dughan atol sa iyang paglingawlingaw sa sulod sa videokehan kuyog sa iyang higala sa sitio Calderohan, barangay Maguikay, dakbayan sa Mandaue alas 9 pasado ang takna sa miaging gabii.

Ang namatay mao si Elmer Gad, 25, ulitawo nga molupyo sa maong dapit ug ang mga suspetsado mao sila si Jesson Arenas, 26, ug Jose Lupaopao, 47, minyo nga taga barangay Guadalupe dakbayan sa Bogo.

Si PO2 James Patok nga nahinabi sa Banat News miingon nga kuyog sa biktima sa pag-inom sa sulod sa videokehan sa maong dapit sila si Roland Buhawe, 25, nga taga Lub-ang, Casuntingan, Romeo Villaflor, 27 ug Ann Carmelotes nga lumolupyo usab sa maong dapit.

Matud pa ni PO2 Patok nga nahidangat usab ang mga suspetsado kinsa nag-inom usab sa pikas lamesa kinsa miduol kini ngadto sa nahimutangan sa biktima kay buot makig-ila-ila sa kuyog niining babaye nga si Carmelotes.

Dugang pa niya nga nagdumili sa pagpakig-ila-ila si Carmelotes nga maoy hinungdan sa kasuko sa mga suspetsado kinsa si Lupaopao nga nagdala og kutsilyo kalit mihansak sa dughan ni Gad.

Si PO2 Patoc miingon nga gisunod unta sa pagdunggab si Buhawe apan dali nga nakatapi ug nakadagan pahilayo sa maong dapit.

Gitubag nila ang maong alarma apan ang mga suspetsado dali kining nakasibat pahilayo ug wala kini nila masikop.

Dali nga gidala ang biktima sa Mandaue City District Hospital apan gideklarar kini sa mga doktor nga dead on arrival. – BANAT NEWS