Kanding buhion

CEBU - Dunay 14 ka bukirang mga barangay sa habagatang distrito sa dakbayan sa Sugbu ang hatagan unya og hybrid nga mga kanding.

Kini maoy gibutyag ni Quiot Barangay Captain Vicente Ramos Jr., nga maoy gisangunan ni Kongresista Antonio Cuenco sa pagpadayon sa agri-project niini.

Kini human usab iuli ni Guadalupe Barangay Captain Jingjing Faelnar ang kapin sa P7.6 milyones nga alang sa goat dispersal.

Ang gipaabot ni Ramos mao na lang ang go- signal sa kongresista kung kanus-a sugdan ang pagpadayon sa maong programa.

Nagtoo hinoon ang kapitan nga malangay pa ang pag-implementar niini tungod kay giingong gipa-audit pa ni Cuenco ang pagpatuman ni Faelnar sa pagpananom og seedling.

Apan karon pa lang miingon ang kapitan nga iya nang naandam ang mga barangay nga hatagan unya sa hybrid nga mga kanding.

Duna na hinooy pipila ka barangay kapitan sa south district ang nipadayag og kabalaka kung mapatuman na ang goat dispersal.

Usa ka kapitan nga dili gustong magpahingalan mipadayag sa Banat News nga angayang masundan sa Media ang implementasyon niini.

Kini tungod usab sa iyang mga pagduda nga paburoton ni Kapitan Ramos ang presyo sa palitong hybrid nga mga kanding.

“Angay gyud na tutukan sa Media kay kadto ra bang mga multicab nga gipamalit kaniadto overpriced kaayo maayo na lang kay nabisto,” sumala sa usa ka kapitan.

Ang gipasabot sa tinubdan mao nga ang kapin sa 25 ka mga multicab nga gipang-apod-apod ni Cuenco sa kabarangayan sa south district nga gipatuman ni Kapitan Ramos gihimong taga liog ang presyo.

Gikataho nga tag-P250 mil ang palit sa nahisgutang mga multicab, apan tungod sa kontrobersiya kini gipa-bidding pag-usab ug nahimo na lang tag-P200 mil ang matag usa. – BANAT NEWS