Patay sa aksidente

CEBU - Namatay pipila ka oras sulod sa Cebu City Medical Center niadtong Sabado sa alas 11:00 sa gabii ang usa ka 33-anyos nga lalaki human gikabangga sa iyang motorsiklo ang usa ka jeepney diha sa South Road Property Kinasang-an Pardo ning dakbayan.

Ang namatay giila sa mga tinugyanan sa trapiko nga si Carlito Lucero Jr., nagmaneho sa Kawasaki nga nagtangag og plakang ZH-4053 residente sa A. Lopez St., ning dakbayan samtang gikabangga niini mao ang usa ka L-300 nga pasaheroang may plakang GWL-497, gimaneho ni Antonio Florez, 50, taga Tabada Mambaling.

Naangol usab ang duha ka angkas niini nga sila si Jonimie Lomo, 30, taga Cogon Pardo ug Pablo Alcaya, 35, taga Bojo lungsod sa Aloguinsan.

Sa imbestigasyon ni traffic investigator PO3 Porferio Lim Jr. gikataho nga ang namatay(Lucero) uban sa duha ka angkas padulong unta sa habagatang bahin sa Sugbu.

Pag-abot sa nahisgutang lugar kalit lang niining gikabangga ang jeepney ug sa kakusog sa pagbangga nasarasay ang motorsiklo ug wa na makakontrol si Lucero sa motor ug nalambos sa dalan.

Gidali sila sa pagdala sa CCMC apan way suwerte si Lucero gumikan kay pipila ka oras gikan sa ilang pagdangat sa maong tambalanan namatay kini.

Samtang ang driver nga nakabangga kanila boluntaryong nitahan sa iyang kaugalingon ug gikatakdang pasakaan og kasong reckless imprudence resulting to homicide. – BANAT NEWS