Panag-ilog sa teritoryo sa drug-business maoy gisubay

Drugas ang anggulong gitutukan sa kapulisan sa dakbayan sa Sugbu subay sa pagpamusil nga nahitabo kagahapon sa gabii diha sa barangay Kamagayan diin usa ka Esteban Albeos ang namatay ug naangol ang agalon niining si Allan Catalan, dihang gipauwana’g bala sa duha ka mga tawo nga nagsakay og motorsiklo.

Ang hepe sa kapulisan sa dakbayan sa Sugbu Sr. Supt. Patrocinio Comendador nagkanayon nga nihimo na sila’g mga lakang sa pag-coordinate sa pamilya sa namatay ingon man sa naangol.

Kini aron usab makakuha’g dugang kasayuran labot na sa background sa mga biktima. Matud pa ni Comendador nga ang motibo sa ginadiling drugas wala nila gisalikway ug ingon man ang panagbangi sa mga drug pushers sa maong lugar.

Sumala pa niini nga nagnihit gyud ang supply sa illegal nga drugas ug duna silay nakuhang kasayuran nga duna say laing mga mamaligyaay’g drugas sa maong lugar.

Ila usab ipaubos paraffin test si Catalan human may nakatug-ang gikatahong nakapabuto kini sa iyang armas agi og bawos ngadto sa mga mamumuno.

Samtang iyang giklaro nga ikaduha nga anggulong gisubay nga posibleng polis ang may kalambigitan sa maong krimen human nipasaka’g kaso sa ombudsman ang namatay batok sa mga sakop sa Parian Police Station.

Apan para kaniya layo kining maong posibilidad gumikan kay normal lang sa usa ka police nga mapasakaan og kaso ug gani isip usa ka police dili gyud mahitabong hilabtan niya kadtong nipasaka nila’g reklamo.

Nasayran nga si Albeos maoy nagmaneho sa Honda CRV GSM- 210 nga gipanag-iya ni Catalan uban sa iyang igsoon nga si Junjun, asawa nga si Juana gikan nagduwa’g basketball sa Kamagayan dihang gipamusil mga alas 6:30 kagabii diha sa dalan Junquera sa maong barangay.

Base sa record sa kapolisan ang duha parehong nalambigit sa ginadiling drugas ug gani si Catalan nasikop na kini sa kapulisan sa dakbayan sa Sugbu niadtong 2005 ug 2006 sa kasong kalambigitan sa drugas.

Samtang sa iyang bahin si Supt. Paul Labra II ang deputy director for operation sa Cebu City Police Office nga bangi gyud sa teritoryo sa ginadiling drugas ang motibo sa maong krimen.

Sumala pa niya nga dunay ‘market-market’ diha sa iligal nga drugas ug usa sa gidudahang hinungdan mao ang pag-ilogay sa teritoryo gumikan sa kanihit na karon sa drugas.

Samtang sa pikas bahin, blangko pa ang kapolisan kabahin sa pagpusil-patay kang Jomar de Guzman, 23, nga gipauwanan usab og mga bala sa nagsakay og motorsiklo niadtong niaging hapon diha sa Pardo.

Nasayran nga si De Guzman bag-uhay lang nakagawas sa detention cell sa Pardo Police Station human wala mopadayon og sang-at og kaso ang iyang gikawatan og traysikad nga si Salve Dacalos sa barangay Inayawan.

Si De Guzman nagsakay na unta og habal-habal pauli paingon sa Ermita dihang gipusil sa duha ka wala mailhing lalaking nagmotorsiklo.