Listahan sa mga ‘kiriwan’  sa Guadalupe gihangyo

Giawhag sa kapulisan sa dakbaysan sa Sugbu ang mga opisyal sa barangay Guadalupe ingon man barangay tanod nga moduso sa listahan sa mga kiriwan og kamot sa ilang lugar.

Kini maoy panawagan ni Sr. Inspector Michael Anthony Bastes, hepe sa Theft and Robbery Section tungod kay ang maong barangay maoy nag-una sa top 5 sa mga barangay sa Metro Cebu sa kaso sa pagpangawat sa mga cable wire sa mga nagkadaiyang telecommunication company.

Si Bastes atol sa symposium sa PLDT Bantay Linya program nihagit sa mga opisyal sa Guadalupe ingon man sa mga barangay tanod nga mohimog listahan sa kiriwan.

Kini aron mapadali ang pag follow-up kun adunay mga kawat sa ilang lugar ug silinganang barangay sama sa gihimo sa barangay Calamba ug Sambag Dos.

Apan si kagawad Robert Camo, tsirman sa peace and order sa nahisgutang barangay wala mahimuot nga ang ilang barangay maoy nag-una sa insidente sa mga kawat sa mga cable wire ug wala gyud mahatagi’g solusyon.

Gawas sa Guadalupe ang barangay Sapangdaku, Capitol Site, Kalunasan, Oprra, Mabolo Poblacion Talisay, Umapad maoy daghang kawat sa mga cable   wire sa Metro Cebu.