Ilegal pangolekta sa public school sa Talisay ‘last year’ pa

Isyu kabahin sa pagpangolekta og P35 sa mga tinun-an diha sa Pook National High School dakbayan sa Talisay niadto pang milabay’ng tuig nahitabo pagklaro pa sa mga opisyal sa DepEd ug Talisay City.

Kini may labot sa usa ka tinun-ang mireklamong gikolektahan sila sa mga magtutudlo og P35 kay giingong ipangbayad og bills sa kuryente sa ilang tunghaan.

Dunay gipatumang “no collection” policy ang Department of Education (DepEd) ngadto sa mga pampublikong tunghaan aron di maglisod ang mga ginikanang kabus nga makapatungha ang ilang mga anak.

Si Konsehal Dennis Basillote, tsirman sa edukasyon sa pakighinabi niini sa Banat News kagahapon miklaro nga ang maong isyu niadto pa kining milabay’ng tuig nga diin wala pa gipatuman ang “no policy.”

Kini nahitabo nga may pagtugot sa mga ginikanan pinaagi sa Parents Teachers Community Association (PTCA).

Ang prinsipal sa maong tunghaan nga si Myrna Lucero sumala pang Basillote miesplikar na niini ngadto sa DepEd Superintendent Carmelita Dulangan niadtong Martes kabahin sa maong isyu.

Niana usab adlawa inubanan sa DepEd ug sakop sa PTCA, si Lucero mianha usab sa buhatan ni Basillote ug miesplikar nga wala na kini himoa sa maong tunghaan gumikan sa “no collection policy.”

Sa pagkakaron ang kagamhanan sa siyudad maoy miabaga sa balayranan sa kuryente ug tubig sa mga pampublikong tunghaan sa elementarya samtang sa high school ang DepEd maoy nag-abaga sa konsumo sa kuryente ug tubig.

Ang mga grade five hangtod sa fourth year high school mao ray kolektahan og mga operating fees sama sa membership sa tinun-an sa Boys Scout ug Girls Scout ug sa PTCA.