Biyuda ni Gogong nagpasalamat sa mga misuporta sa pamilya

Gipasalamatan sa biyuda sa  negosyante nga si Renerio “Gogong” Arrogante III ang mga molupyo sa lungsod sa Daanbantayan ingon man ang mga Sugbuanon nga nagpuyo na karon sa nasud sa Australia sa pagpakita niini sa mainiton nga suporta kaniya sa tinguha nga makab-ot ang hustisya sa linuog nga pagpatay sa iyang bana.

Si Ginang Juliet Arrogante sa gipaabot nga mensahe sa Banat News miingon nga dako gayud kaayo ang iyang kalipay nga wala gyud magpakita og kabugnaw ang mga molupyo sa Daanbantayan sa ilang pagpaluyo kanila.

Daghan kanila ang miduol kaniya ug mipadayag sa ilang pagpaluyo nga makab-ot ang hustisya sa pagpatay sa iyang bana.

Nalakip sa iyang gipasalamatan ang mga kadagkuan sa Justice for Gogong Movement nga naglihok karon dili lang sa lungsod sa Daanbantayan kun dili sa uban pang lugar lakip na usab sa nasud sa Australia.

Subli nga gipasabot ni Juliet nga nasubo sila sa walay pagpakita nga pagpakabana sa mga opisyal sa lungsod sa Daanbantayan aron makab-ot ang hustisya sa pagpatay sa iyang bana diin kini ang rason nga nangayo sila og tabang ni Pres. Gloria Macapagal Arroyo ingon man sa mga opisyal sa nasud sa Australia.

Si Renerio nga nainila sa lungsod sa Daanbantayan nga Gogong gipatay atubangan sa iyang asawa nga si Juliet ingon man sa anak niini nga si Renren. Usa ka Army Seargent nga si Moises Ludoc gitumbok nga maoy nagpatay ni Gogong.